Eric:   歡迎大家再次收聽我們網上的節目，生命恩泉網上靈修 2023，今天我們的主題是「愛」，坐在我旁邊的女士名叫 Fiona 。當我看著她，就很想知道是不是可以聽到一些愛情故事。Fiona，是不是有一些愛情故事可以和我們分享？

Fiona:   我的愛情故事，足可以寫成一本書。開始的愛情故事，是一個比較傷感的故事。讓我先分享一下天主如何把我召叫回祂的大家庭，這已經是很奇妙。之前，我答應了一位男士的邀請參加慕道班，所以我才加入天主教這個大家庭。當時，我們準備結婚，他希望我去聽道理，那時的我還是個佛教徒。當時我覺得沒有所謂，就當是陪朋友去聽聽吧，反正都快結婚。我當時是沒有準備接受領洗這個想法，後來知道原來堂區可以為上了三個月慕道班的我，作特別安排，讓我們先領洗，隨後便可在聖堂舉行婚禮。

Eric:   那就可以在聖堂結婚。

Fiona:   對，我感到非常開心，因為可能我看了很多電視劇，很喜歡在聖堂行婚禮。我覺得像童話故事一樣，一定會很開心。所以我很期待。當時所謂的上慕道班，感覺就只是去聽一聽，是為了要結婚而去。我將會在領洗後一個星期結婚。但是在之前的一個星期，跟當時的未婚夫突然發生一些爭執，在極度不開心的狀態下，我問天主，去祈禱：究竟這位男士是否適合我跟他走我的人生路，作我的終身伴侶呢？ 天主給了我一個啟示，「有奇蹟！」這一幕就是讓我見到，原來他有另外一個女人。當時我在想：我是不是不應該結婚呢？

Eric:   是怎樣讓你看到？

Fiona:   就在我祈禱完畢，問天主他是不是合適的對象的時候，不如道為什麼我走到中環的一條行人天橋上，被我見到有另一位女士跟他擾攘地出現，當時我並沒有看清楚那位男士，但我就聽到那位女士呼叫那位男士的名字，而當她把他的銀包拿出來時，我見到那個銀包就是我送給我當時的未婚夫的銀包。

Eric:   都在無意之間，在無意之間讓你見到。

Fiona:   我覺得很奇妙，我原想跟著他們，但最後跟不上。我這位前夫，前未婚夫，當時不肯承認。我問他是不是有另外一個女人，他說他沒有，只是客人的關係。我當時選擇相信他，我亦相信我自己，因為我覺得，天主雖然給了我一個啟示，但我自己，應該有能力改變這種關係。

Eric:   有信心

Fiona:   是。就算他有另外一個女人，都不會是個問題，因為結了婚，就是另一個開始。所以我就領了洗，在聖堂舉行婚禮。

Eric:   童話故事想繼續下去

Fiona:   對呀，我當時真的充滿，當時的想法是，唔，一定是很美滿。

Eric:   那最後怎樣？

Fiona:   我結了婚，第一日已經不開心，因為之後他每晚，其實一個星期他都只是回來三晚，而那三晚每晚回來時都已經是半夜三點鐘，是，就算見面我們沒有很多相處的機會

Eric:   才剛剛結婚……

Fiona:   是。他其實很少回來，我一直在哭，天天哭，哭了多久呢？ 差不多哭了一年多。即是，我每天都等待他回家，其實大家都相處得非常不開心。就算他那天早一點回家，一見面，都是吵吵鬧鬧，跟著還動武，我從沒有想過他是真的這樣暴力。之前拍拖時，他曾經試過一次掌摑我，因為他誤會我，以為我有另外一個男人，當然沒有。我當時十分生氣，但是我原諒了他。之後不知道什麼原因，他的暴力傾向愈來愈嚴重。我甚至乎又被他打，去醫院，我自己去看醫生。醫生叫我報警，但我就沒有選擇報警。我當時就在我爸媽家中躲避，想避開一下，隔開一下就不會再有些什麽事，而他都有來哄我。我心想，就回去跟他再一起。其實那個女人是沒有離開過他，還不停的打電話來騷擾我，玩弄我，諷刺我，在我生日那天打來祝我生日快樂 ……

Eric:   故意刺激你

Fiona:   當時我的丈夫並沒有和我一起過生日，我當然生氣到極點。非常不開心，跟著最不開心的一幕，我記得，那天，他因為覺得我身邊的朋友會聳恿我跟他離婚，他當然不想離婚，因為他沒有工作，當時他已辭工，想著我可以負責家裏所有開支。我以為我付出這麼多，他會對我好一點，但他並沒有，他選擇那位女士都不選擇我。當時我真的很不開心。

Eric:   是，很傷心

Fiona:   我以為，沒所謂，雖然那位女士常常纏繞我，他又用武力對待我。跟著有一次，他一心想握頸把我勒死，他想搶我的電話，因為他覺得我的朋友會嚴重地影響我，令我們的關係破裂，他便沒有錢繼續去生活。他把我扼至快要窒息，幾乎斷氣，這一刻對我來說是一個信仰的轉捩點，為什麼？在我面臨死亡，斷氣的一剎那，我其實已經失去知覺，當時我跟天主說，因為他緊扼著我的頸，在他的床上，我不想死，上主你不要讓我死去，我真的不想在這一刻離開這個世界。馬上，我的右手可以活動，抓到他的面上，跟著他便退開。我很感恩，因為在他退開的那一刻，我沒有死去，我慢慢回復呼吸。我當時真的很驚恐，我是害怕到一個點，是，怎麼辦，他發了瘋似的對我說，如果你現在這刻選擇繼續睡覺的話，我一定會用枕頭把你憋死。所以那一晚我沒有睡覺，跟他站著對恃了整個晚上，一人一個角落。那時我真的覺得是天主幫了我，因為我的手能活動，搥打到他的面上，他鬆開手，我才沒有死去。要不然，我的生命已經結束

Eric:   即是在最關鍵的一刻，你記住天主

Fiona:   是呀，對呀，我真的不知道，在那一刻我確實是求救無門，我沒有可能呼叫，那一刻跟本是失去了知覺，那一刻真的是很奇蹟，那一刻我的手竟然能動。

Eric:   其實你只是能動，抓他的臉。

Fiona:   他真的是退開了。

Eric:   這個就是天主的工作，我相信就是。

Fiona:   是！

Eric:   靠你那奄奄一息的一抓，未必能阻擋到他。

Fiona:   我很感恩！我依然有生命。我們對恃了一個晚上，之後我就離開。到了早上，還是很害怕，只可以回去爸媽家躲避幾天。我是個比較心軟的人，我還是不想離開他，被他哄了又再跟他在一起。他的那個女人還是不停地騷擾我，我覺得很煩，很辛苦，那個女人打來說些什麽，我打掉孩子，殺害生命等等。

Eric:   糾纏了這麼久，到頭來，事情怎樣？

Fiona:   後來是因為，最後有一次，他收起了我的銀包幾天，我什麼錢也沒有，只剩下一張八達通卡，電話和身份證。我的家人很擔心我的信用卡會被他盗用，不知會發生什麼更可怕的事。最後，家人選擇報警。當時我是不願意，其實我對他真的是很仁慈，不想拖垮他。我的家人很堅持，催迫我報警，控告他盗竊罪，還有我的情況非常危險。警察問我曾經發生的事情，我如實道出，我的家人提到他打我，那位警察單獨在房間查問我。我描述他怎樣打我，有好幾次很嚴重，雖然不是完全受傷，只是恐嚇我。我問警察：我告訴了你這些事情，他會不會留有案底？警察說：是，好了，那些事你不必理會。我說如果會有案底的話，那就不報警。那位警察說不可以這樣。我真的不想把他拖垮，他不再愛我沒有問題，我真的不想。

Eric:   你在說前夫，對嗎？

Fiona:   是的。

Eric:   即是最後還是離了婚。

Fiona:   對，後來，因為這次報警事件，那位警察勸我馬上收拾東西，離開他，因為他們不想多一宗命案，而他仍然不斷地纏繞我。向警方備案後，我們分開了，但他還是不停地在教堂門口，在公司樓下，在不同的時段埋伏我。當時我請求教友，當時的同事，老闆保護我。因為他是個很危險的人，他可能會把我推出馬路啦。試過有一次在地鐵內推倒我，拖行了一段路。我當時很不開心，真的好像活在地獄內，我可以形容我當時的生活能够寫一本書，因為真的很難受。那個女人又經常對着我指駡，當時覺得很凄慘。

Eric:   最後是如何開脫？

Fiona:   我自己去找律師簽紙離婚，我沒有想過找教會幫忙，因為我當時懂的不是很多，只知道這段婚姻已經無法挽救，在我決定離婚前都有問過他，到底有沒有愛過我。因為他滿口都是那個女人，而最令我傷心欲絕的一刻就是他說，由始至終我都沒有愛過你。我覺得，這樣我要走就走得很輕鬆，我决定跟他離婚。

Eric:   這件事，令你覺得什麼是愛？

Fiona:   我覺得天主給我的那一份才是真正的愛，我覺得天主真的很關心我，當我在人生最低潮時祂沒有放棄我，我沒有因此而失去生命，天主亦給派了很多天使在我身旁。當時我在團體已經加入歌詠團，剛好碰上一位女孩子說要讀教理班，參加這個教理班亦是我信仰上的轉捩點。我參加了這個教理班，認識了我的信仰，我立刻覺得生命豐富起來，信仰亦加深了很多，我很感恩。之後我教導主日學，參加探訪團，有不同團體的兄弟姊妹陪伴著我。雖然我當時申請離婚，我前夫卻不願意簽紙，他是故意要拖著我，不讓我這一輩子可以再婚。我覺得沒有所謂，因為我也沒有不想再結婚，我當時真的是這樣想。之後，有教友跟我說，為什麼我不去申請特恩。我問他申請特恩有什麽用，他說，可以證明你是單身。教會可以簽發證明你是單身，你就可以再有機會開展另一段婚姻。我當時還說我是不會再有。

Eric:   即是有下一段愛情故事可以聽？

Fiona:   我真的很感恩，去年我再結婚。連我自己都感到意外，結婚一年多離了婚，過了這麽多年的單身生活，我覺得我很忙碌，教會內很多事情都需要去幫忙，我沒有時間想這些事情。其實我不斷為這件事情祈禱，我問天主我還會不會再有婚姻機會？雖然我的年紀不輕，還會不會有機會呢？真的很難找到一個品性純良的男生，以我的年紀，經歷這麼多的男生都不會太純品，但不要緊，我相信天主是全能的，唯有依靠你才可以，靠我自己是沒有辦法找得到。我覺得不可能。但又不可以這麼說，因為天主是全能的，可能在祂手上就有可能。

Eric:   在天主，一切都可能。

Fiona:   是，我常常說沒有天主就沒有我，所以我覺得還是交給你吧！你給我找的一定是最好的。竟然在兩年前，我跟一位舊同事在臉書上重遇，之後大家相約見面，接著在一個聚會中她介紹他丈夫的哥哥給我認識。那時也沒有太多想法，但她卻安排我跟他哥哥吃飯，我當時想，吃一頓飯沒什麼，晚飯後他送我回家的時候，讓我有著不一樣的感覺。

Eric:   就這樣開始了 。

Fiona:   是之後的另一次，大伙兒再相約出來後就開始拍拖。

Eric:   現在結婚了。

Fiona:   結了婚。

Eric:   那你會怎樣形容這段關係？

Fiona:   我覺得是一個奇蹟。

Eric:   奇蹟。

Fiona:   是，他確實是個比較純品的人，他雖然不是教友，但他還是比較純品簡單，跟他相處，令我覺得很舒服，大家有很多想法和處事方式都很相近。我覺得這絕對不是我能找到，我和他相差太遠，他工作的行業跟我完全不同。竟然在天主的安排下認識他。我覺得天主真的很疼愛我。連我身邊的朋友都說，在我身上看到很多奇蹟。從我之前的那段婚姻，如何在低谷站起來，接著我怎樣找到現在這段婚姻，我都感到愕然，很奇妙，我跟本沒有想過會再結婚，竟然又會再有一段婚姻。所有事情，在我的婚姻裡面，在我安排婚禮時都有些阻滯，我現任丈夫都是離過婚。在教會內，即使是非教徒都要申請特恩。有些事情都感到意外。開始時只是想拍拍拖維持同居關係，但他竟然肯答應結婚。是奇蹟，全部都是奇蹟。

Eric:   你覺得是奇蹟，我在聽的時候，覺得在你的第一段婚姻裡，聽到一句重覆了很多次的說話：我認為我對他好，我認為我可以影響他。很多時我們人都是這樣，我們以為我們可以做一些事情，原來天主的安排並不是我們人所能夠想像。反而在這些艱難的時間，這些辛酸，是天主告訴我們要去依靠祂，對嚒？原來在快要斷氣的那一刻，你把自己的生命交給天主，向天主祈求的時候：「你交給我吧！」天主就帶領你，以後的路便完全不一樣。

Fiona:   是，是。

Eric:   我祝福你現在這段婚姻美滿。

Fiona:   感謝。

Eric:   希望以後的路天主會一路帶領你。

Fiona:   我深信！

Eric:   多謝你的分享Fiona。

Fiona:   多謝。

[場景 - 醫院 - 醫生休息室] 

Amanda:   (自言自語) 天主，其實當我見到改變咗之後嘅阿樂，同埋祈禱會裏面嘅人，我已經知道祢係存在嘅，只不過，我覺得……祢係佢哋嘅天主……而我就好似局外人咁，我同祢好陌生，冇乜關係，祢對於我嚟講，係好遙遠好遙遠呀。由細到大我都真係經歷咗好多好深刻，對我嘅人格成長，對我之後嘅人生有好大影響嘅痛苦，造成咗好多永不磨滅嘅傷痕，……如果祢係愛我嘅，咁點解祢會由得呢啲事發生喺我身上嘅？我唔相信一個爸爸會忍心見到自己個女咁，都唔盡力阻止嘅。我真係唔係好明呀……

李姑娘:   黃醫生，早晨！

Amanda:   吓，李姑娘，又係你？點解呢好似逢親我喺休息室嘅時候，你都會嚟搵我嘅？

李姑娘:   (神情凝重，哀傷) 黃醫生，……尋日你off，我哋冇通知你咋……程日朗小朋友佢琴日過咗身喇！

Amanda:   吓！Brain cancer?

李姑娘:   係呀，發現得太遲喇，……呢度呢係日朗媽咪寫俾你嘅聖誕卡，佢話要交俾你喎……

Amanda:   OK, Thank you!

李姑娘:   好啦，無嘢喇，唔阻住你休息喇。

Amanda:   OK, bye~~

日朗媽媽:   黃醫生，你好！我係程日朗嘅媽媽。雖然我哋素未謀面，但係聽病房嘅姑娘講，喺日朗啱啱入院，亦都係佢過身之前嗰一晚，好多謝你犧牲自己休息嘅時間去陪伴咗佢。佢好怕黑㗎！至少喺佢短暫嘅人生最後嘅一晚，佢唔需要喺黑暗同埋驚恐之中，一個人去面對。有一個佢信任嘅人喺佢身邊支持佢，即使係面對疾病的痛苦，佢都係要自己去承受。但係有一個人陪伴，總俾佢一個人孤伶伶咁去面對，感覺好得多，令我作為媽媽嘅都感到稍為安慰。雖然心情係沉重，咁細個嘅小朋友都未有機會好好咁去欣賞呢一個咁美好嘅世界就已經要離開，作為媽媽，沉痛悲傷嘅心情真係好難用言語去表達。但係我明白，生老病死同埋人生種種嘅痛苦都係無可避免嘅，亦都唔可以去怪責任何人。我知道你哋嘅團隊好專業，已經盡咗你哋嘅能力去救日朗。你哋唔單止專業，仲充滿愛心，真心關懷你哋嘅病人，願意為佢哋犧牲同埋付出，好感激你哋對日朗嘅愛，使佢能夠喺愛當中離開，亦都算係一種幸福。加油呀！知道你哋嘅工作都好辛苦！祝你有一個充滿愛，喜樂，同埋希望嘅聖誕節。Merry Christmas! 程日朗媽媽。

[場景 - 聖堂 - 活動室]

眾:   感謝主！讚美主！Merry Christmas!

Luke:   拜拜！阿樂！Amanda! 下個星期記住返嚟呀，我哋祈禱會聖誕party！

樂 & Amanda:   Sure! Sure! Bye~下星期見~

[場景 - 聖堂外 - 回家路上]

Amanda:   阿樂呀！你哋嗰啲外星人病毒真係好勁呀，我懷疑我已經中咗招喇！

樂:   咁你有咩病徵吖？

Amanda:   嗯……當我自己一個人嘅時候呢，我開始會同一個從來都冇見過，亦都睇唔到，即係你哋嗰個外星人首領傾偈呀。我睇嘢嘅時候呢開始見到啲粉紅色心心，仲開始會有啲異常嘅行為，做一啲我以前唔會做嘅嘢，講一啲我以前唔會講嘅嘢，哎呀！真係好得人驚呀！

樂:   哈哈！咁你究竟做咗啲乜嘢異常行為吖？

Amanda:   嗱！(遞上程日朗媽媽的聖誕卡) 你自己睇咯。

樂:   Woo! 呢個程日朗嘅媽咪都真係幾犀利！自己嘅小朋友送咗入醫院之後冇幾耐就過咗身，佢唔單止冇埋怨其他人，仲寫聖誕卡多謝你陪佢個仔……

Amanda:   ……你記唔記得我上次咪同你講我有啲嘢棘住嘅？……我終於知道係咩喇！

樂:   同呢個小朋友有關？

Amanda:   hm……原來……我唔係唔相信有天主，而係，……我唔相信佢愛我呀。

樂:   因為仲未組織到自己嘅家庭？

Amanda:   喂呀！你使唔使咁中呀？

樂:   哈哈！Sorry囉！

Amanda:   其一啦！其實喺我好唔明白，點解佢會由得嗰啲不幸嘅事發生喺我嘅身上，搞到我傷痕纍纍，有啲傷口仲喺度滴緊血，舊患未好，新傷又嚟，你話我點可能唔棘吖？

樂:   咁，就係呢一張聖誕卡，解開咗你個結？

Amanda:   成件事根本就係好不可思議，完全唔合邏輯㗎。首先，正常嘅我係冇可能，我亦都從來冇試過咁樣陪一個病人，而最違反常理嘅就係嗰個媽媽呀！我相信佢送個仔入醫院嘅時候，一定冇諗過，以後都唔能夠再見返佢，但係佢竟然仲咁有閒情逸致去寫張聖誕咭俾我呀，…… Oh it just blows my mind!

樂:   我同意啊！雖然字裡行間睇得出日朗媽媽佢真係好傷心。但係同時呢，亦都感受到佢對佢個仔嗰份無私嘅愛，係完全從佢個仔嘅角度出發，為佢著想，為佢得到幸福，被愛，而感到安慰。

Amanda:   最救命嘅就係，佢話佢唔會怪責任何人，仲讚我哋專業呀，佢話明白我哋已經盡咗最大努力……唉！我真係O哂嘴……相比起佢死咗個親生仔，我嗰啲算係咩痛苦受傷啫，佢可以喺自己嘅痛苦之中仍然感恩，仍然去關心，同埋去鼓勵其他人，……唉，我真係無嘢講喇！

樂:   佢遇到嘅不幸，無令佢沉淪，因為佢對佢個仔嗰份無私嘅大愛令到佢心靈好自由，唔會俾痛苦困住。而正正呢係因為呢份自由，令佢有能力去感恩，可以將佢發自內心源源不絕嘅愛，喜樂，同埋希望帶俾佢身邊所接觸到嘅人。

Amanda:   係呀！我真係俾呢個媽媽兜巴刮醒呀，我個心其實而家都仲未震完㗎。

樂:   我明呀！發現真相嘅時候，其實真係好難面對嘅！

Amanda:   當我發現咁多年嚟我話自己生活喺痛苦之中，不停去投訴，埋怨人哋對我唔好，個天對我唔好，成個宇宙都欠咗我嘅時候，哎呀！突然俾人篤爆，一切其實原來都係我自己攞嚟嘅，係我自我中心，係我執著，係我嘅心靈唔自由，係我唔識感恩呀，嘩！Bom一聲！泡沫爆破！但係我明明係悲劇裏面嘅主角嚟㗎嘛……我真係瘀爆呀！

樂:   誒，你又唔好咁樣樣，嗱，你試吓咁睇吖，幾十年嚟，你以為自己跛咗，要坐輪椅咁樣樣，嗱，而家醫生同你講喎，原來你冇跛到㗎喎，可以行得走得，唔使再坐輪椅。咁你唔係應該好開心，好興奮至係咩？

Amanda:   唉，死啦，我連咁都錯！

樂:   哈哈哈！唔係，其實你已經好叻㗎喇！咁短時間，有咁多嘅頓悟，你唔單止有天主愛嘅DNA，你仲好勇敢，不斷追尋，反省，實踐所發現嘅嘢，突破自己嘅Comfort zone。如果呀唔係你肯同天主嘅恩寵合作，我諗你應該唔可以咁短時間就有咁大嘅進步，邊可能有咁多嘅得著吖。

Amanda:   嘩！你睇吓下你吖！你竟然會講啲咁鼓勵人嘅說話呀？

樂:   哈哈哈！你呀都陪咗個小朋友成晚啦。

Amanda:   我頭先咪自咗首囉，我認咗中咗你哋嗰啲外星人病毒呀。

樂:   歡迎你返嚟天國嘅大家庭。

Amanda:   喂，其實呢，仲有一樣嘢，我諗通咗喇。

樂:   Joseph?? 

Amanda:   (深呼吸) OK, 我會慢慢習慣你嗰啲乜都睇穿我嘅嘢㗎喇……Anyway啦，你記唔記得你咪問過我知唔知道我要嘅係乜嘢嘅？

樂:   記得！我哋第一次見返之後，喺coffee shop嗰度呀嘛。

Amanda:   hm……我發現個問題唔係我知唔知我要嘅係乜嘢，而係我搵錯咗地方……我搵嘅嘢，係唔會喺任何人類身上搵到㗎。我以為只要我搵到一個愛我嘅人我就會得到幸福，所有問題都會解決。我遇到嗰啲人唔係唔好，亦都唔係同我唔夾，而係，我喺佢哋身上根本揾唔到答案呀，佢哋解決唔到我嘅問題，醫治唔到我嘅傷口。

樂:   你根本冇辦法去接受佢哋嘅愛，你亦都冇能力去愛佢哋，因為呢你同愛本身斷絕咗關係，你唔相信天主愛你……你根本唔相信愛。

Amanda:   (低頭默認) 嗯！係呀！我以前根本唔相信有愛，啊！嗰邊有班年青人喺度報佳音喎！

樂:   係喎，過兩日就聖誕節囉喎。

Amanda:   嘩！今年嘅聖誕節對於我嚟講，將會好唔一樣。

樂:   係呀！以後嘅聖誕節，都會同你以前過嘅好唔一樣。好啦！等我預先送份聖誕禮物俾你先啦。

Amanda:   嘩！咩嚟㗎？乜你可以隨時變樣嘢出嚟嘅，乜你啲超能力咁勁嘅？

樂:   哈哈哈！嗱！呢條就叫做玫瑰念珠，係要嚟念玫瑰經嘅，我陣間就send啲資料俾你教你點樣念啦，呢個十字架上面呢有耶穌嘅苦象，係代表天主對我哋嘅愛同埋救恩。我哋唸玫瑰經嘅時候呢就係默想耶穌嘅一生。淨係佢為我哋降生成人呢件事，已經顯示咗天主對我哋嘅愛，係超越人所能夠理解……

Amanda:   OK, one step at a time……

樂:   哈哈哈！Sorry sorry一時高興得滯，想要將所有嘢一次過傳授哂俾你添。

Amanda:   Anyway, 好多謝你嘅玫瑰念珠，真係一份好有意義嘅聖誕禮物。其實我更加要多謝你，幫我搵到咁多年嚟我心裏面一直想搵嘅嘢。

樂:   哈哈！係粉紅色心心filter？哈哈！……唔使多謝我喎，帶返啲流落異邦嘅同鄉返去天國，呢啲嘢人人有責㗎喎！你第時都要咁做呀！薪火相傳吖嘛！

今日反思

1. 你有試過在痛苦中仍然感恩，仍然關心，祝福，及鼓勵其他人嗎？為什麼你要這樣做呢？
2. 你曾否試過埋怨身邊的人待薄你，甚至天主待你不公允呢？什麼導致你這麼想呢？
3. 你曾否試過在受造物身上尋找心靈的滿足呢？以為得到了就會幸福呢？
4. 在你的生命中有傷口需要醫治嗎？有找耶穌醫生來醫治你嗎？
5. 聖誕節為你來說有什麼意義呢？
6. 耶穌有誕生在你心嗎？為何你會這樣以為呢？
7. 耶穌的誕生為你的生命帶來了什麼改變呢？

每日聖言

「看，一位貞女，將懷孕生子，人將稱他的名字為厄瑪奴耳，意思是：天主與我們同在。」(瑪1:23)

「不是我們愛了天主，而是他愛了我們，且打發自己的兒子，為我們做贖罪祭。」(若一4:10)

每日禱告

慈愛的天父，感謝祢不但讓我明白到當我在母胎被形成以前祢就愛了我，更求祢派遣聖神來到我心中，讓我明白到苦難在生命中是不可避免的，發生不幸的事不代表祢就不愛我。求祢賜我信心，使我在遇到困苦時，仍然堅信祢的愛，並相信我並不是孤單一人，因為祢永遠在我身邊陪伴我，支持我，與我同行。

主耶穌，感謝祢，為了我們降生成人，為我們帶來了永生的希望，圓滿的喜樂及無條件的愛。感謝祢在這個將臨期裡一直陪伴我們，幫助我們準備好我們的心田，迎接祢誕生在我們的心中。求祢幫助我們在這普世歡騰的節日氣氛中，能懷著一顆感恩的心，無論在甚麼環境，在人生中的甚麼境遇下，都能歡天喜地，慶祝祢的降生，並使我們的生命能成為其他人的一份祝福。讓我們從祢的降生所得到的希望，喜樂及愛傳給身邊的人，傳遍普世。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - 聖堂門外的路上]

Amanda:   移民去你個星球，就可以變到同你哋一樣㗎咩？

樂:   你都知道㗎，我移民去呢個星球之前咪同你差唔多，可能個病情仲嚴重過你添。

Amanda:   吓？你覺得我有病咩？

樂:   我覺得你視覺受損，睇嘢模糊不清，令到你睇唔度身邊嘅人對你嘅愛囉。而且應該個心都幾硬，唔感恩之餘，更加拒絕人哋對你嘅愛同埋關心……咁算唔算有病呀？

Amanda:   哼……你哋班外星人呀真係好恐怖㗎，唔止自己識得發光，而且仲有super natural power可以睇穿人哋個心呀。

樂:   哈哈哈，係呀，我哋仲有好多超能力，你都仲未睇到哂！

Amanda:   阿樂，你果然係Marketing界嘅超新星！嗯，你個plan都係好吸引嘅！但係移民去第二個星球做外星人咁大件事，我都真係要諗清楚啲先，仲有好多嘢㗎，其實我都唔係咁明白，我需要了解多啲，同埋研究吓啲合約條款先。

樂:   哈哈，大醫生做乜突然間工作mode上身呀？即刻變咗個精明消費者。好吖！咁你覺得究竟有啲咩棘位？講出嚟睇吓我幫唔幫到你？

Amanda:   Hm……我唔單只擔心自己能唔能夠完全咁認同你哋嘅價值觀，我更加擔心嘅係自己能唔能夠適應你哋嗰種lifestyle。即係譬如，我明白如果能夠好似阿Ruth佢咁樣，睇嘢呢好似加咗個粉紅色心心filter，所有嘢都變得好positive，好有愛，我都好肯定一個覺得自己俾愛浸住嘅人呢，係好幸福嘅。但係我暫時真係幻想唔到，我能夠做得到囉。

樂:   哈哈哈……唔緊要，幫緊你幫緊你……等我介紹返先，俾多少少背景資料你啦……hm……我哋嘅星球叫做天國，國王呢叫做天主，佢呢有好多個稱號嘅，其中一個叫做愛，基本上呢所有人類原本都係嚟自呢一個星球㗎喇，擁有天國永久居民嘅身份。所以呢嚴格嚟講，你並唔係移民，而係回流返去啫所以，你原本就有天國子民嘅DNA，就好似嗰啲呢同父母失散咗，後來被人發現喺森林裏面俾動物養大嗰啲人咁囉，只要呢佢哋返返去人類嘅社會，最終都可以好似個人咁樣生活嘅……你係屬於天國嘅，隨時都歡迎你返嚟。

Amanda:   ……嗯，但係咁多年嚟喺森林裏面生活，我已經被洗腦㗎喇，我相信自己係一隻狼，思想，行為，說話，都已經係同狼一樣㗎喇，雖然我見到你哋之後，我好嚮往能夠成為你哋嘅一份子，你嘅說話亦都真係好encouraging，令人覺得好有希望……唉，但我都唔知點解，仍然係好猶豫囉……

樂:   誒，慢慢嚟啦，one step at a time, 天主都等咗你咁多年啦，佢一啲都唔心急……好啦！你好好休息，我會繼續為你祈禱嘅，你都試吓同天主傾吓偈啦。

Amanda:   好啊！Thank you你！Good Nite!

樂:   Good Nite! 下星期見！

Amanda:   我盡量啦！See ya!

[場景 - 醫院 - 員工休息室]  

Amanda:   (自言自語) 天主，如果祢真係存在，又真係都愛我嘅話……咁……請祢俾阿Ruth嗰個粉紅色心心filter我吖，唔該祢吖。

蓮姐:   哎呀，黃醫生，你今日返嚟真係好喇。

Amanda:   早晨呀，蓮姐！

蓮姐:   前日我唔知你唔返，等我仲煲咗啲雪梨水過你飲，唉呀，結果我自己一個飲哂。哈哈，飲到我幾飽啊，飯都唔洗食呀！哈哈，我都諗住呢今日你點都會返啦啩！又搏吓！煲咗呀！嗱！仲熱㗎！快啲趁熱飲啦！

Amanda:   吓，蓮姐你……咁咪要好早起身煲咯？

蓮姐:   冇冇冇，誒，好簡單嘢嚟嘅啫！你成日咁辛苦捱夜，係要滋潤返吓㗎喇。

Amanda:   嘩，真係好清甜好滋潤喇，多謝哂你呀，蓮姐。

蓮姐:   多咩謝呀，咁少意思，你飲得開心，蓮姐就開心㗎喇。

Amanda:   仲有好多喎，蓮姐，你飲唔飲啲呀？

李姑娘:   黃醫生！

Amanda:   又點呀，李姑娘你又搵唔到陳醫生呀？

李姑娘:   唔係呀，兒科嗰邊啲兒童腦神經科醫生做緊大手術，call緊顧問醫生返嚟㗎啦，但係有個新收返嚟嘅小朋友有緊急情況想請你過去睇睇先呀。

Amanda:   哦，蓮姐呀，多謝哂你先，我一陣間再返嚟飲，……喂，行得喇，李姑娘。

[場景 - 醫院 - 兒科病房]

姑娘們:   黃醫生。

Amanda:   咩情況？

兒科姑娘:   喺兩個鐘頭之前啱啱收咗佢返嚟，佢本來係瞓著咗㗎，但係突然之間扎醒，亦都有嘔吐嘅情況，跟住就開始全新肌肉痙攣喇。

Amanda:   ABCs (Airway, Breathing and Circulation) maintained?

兒科姑娘:   Yes, ABCs maintained.

Amanda:   你好呀！程日朗小朋友，我係黃醫生呀，唔使驚吓，啱啱嚟到醫院係咪好唔習慣呢？你唔使驚，我哋而家嚟幫你等你可以盡快好返，咁你就可以好快返屋企㗎喇。……嘩！好叻喎你，慢慢就好返啲喇……姑娘，Airway Suction……

兒科姑娘:   Airway Suction ready……

Amanda:   日朗小朋友，嗱，而家黃醫生好擔心呢，唔知會唔會有啲痰呀或者其他嘢走咗落氣管同埋個肺度，我要快啲吸返佢出嚟，咁你就會舒服返哂。唔會好痛嘅啫，嗱，你儘量放鬆啲，好似去跑步咁，攰到軟泥泥咁。好快就得㗎喇，係喇就係咁喇……唔使驚呀，黃醫生拖住你隻手仔呀……

眾姑娘:   林醫生。

Kelvin:   唔該哂你呀，Amanda, 我take over得㗎喇，知你嗰邊仲當緊值。

Amanda:   It's ok, 之前break緊啫，我返過去先喇咁。

[場景 - 醫院 - 病房]

Amanda:   唉，終於都寫哂啲report喇，我走先喇。

李姑娘:   咦？黃醫生，你聽日早更喔你仲未走呀？好快啲走喇！

Amanda:   唉，我都知，……我而家走喇。Bye~

兒科姑娘:   黃醫生，黃醫生，……好彩，你未走呀……

Amanda:   我個shift完咗好耐㗎喇，不過我寫埋啲report先之嘛。

兒科姑娘:   ……頭先嗰個程日朗小朋友……

Amanda:   吓？！佢咁快又返發喇？

兒科姑娘:   佢喊得好犀利呀，我驚佢又抽筋呀。

Amanda:   佢做咩喊又成咁呀？

兒科姑娘:   er……佢話佢好驚，要搵你喎。

Amanda:   好啦好啦，我去睇吓佢咩事啦。

兒科姑娘:   咦，黃醫生？你咁早就喺度嘅？唔通你琴晚成晚都冇走呀？

Amanda:   shhhhhh! 你咪嘈醒佢呀！佢琴晚成晚扎醒，啱啱先至瞓得咁林㗎咋。

兒科姑娘:   OK! 而家都天光㗎喇，佢應該冇事㗎喇，你都快啲返去休息啦。

Amanda:   我今日早更呀！我落去買杯咖啡先。

兒科姑娘:   黃醫生，你頂唔頂得住㗎。

Amanda:   No worries! 我諗我其實都有外星人嘅基因嘅！Bye~~

今日反思 

1. 你認為，你算是個事事感恩的人嗎？要事事感恩困難嗎？
2. 你曾否試過陪伴問道者，並且用盡各種方法協助他們認識天主教信仰嗎？為什麼呢？你會經常這樣做的嗎？
3. 你曾否試過與人分享你因更熱心追尋信仰而變得更好的故事，勇敢地為信仰作見證呢？你會經常這樣做的嗎？為什麼呢？
4. 你曾否有遇到一些耶穌在聖經裡的教導或者教會的教導，感到自己無法做到，難於實行呢？你會怎辦呢？你有試過祈禱，求耶穌幫助你嗎？
5. 你曾否試過為別人的好處，特別是那些與你非親非故的陌生人，而犧牲自己嗎？那經驗是怎樣的呢？你會經常這樣做的嗎？

每日聖言

「可愛的諸位，我們應該彼此相愛，因為愛是出於天主。凡有愛的，都是生於天主，也認識天主。」(若一4:7)

每日禱告

慈愛的天父，感謝祢讓我明白到我不但生來就有天國子民的身份，更是祢的子女，有著祢的遺傳基因，愛的遺傳基因。是因為原罪的影響，並在成長中，不知不覺地被世界所同化，以致我喪失了「愛的能力」，或者更好說，我「愛的能力」被埋沒了。求祢派遣聖神來到我心中，賜給我聖神七恩，並將埋藏在我內的「愛的潛能」發揮出來。主耶穌，感謝祢，因著祢降生成人的奧蹟，使世界得與天父和好。求祢誕生在我的心內，使我因著祢救贖的恩寵，不但心中充滿祢的愛，且能將祢的愛傳給我身邊所有的人。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - Amanda家]

Amanda:   (筋疲力盡) 唉……我真係覺得好攰，……一個人生活，……一個人面對所有嘢。冇人關心我，冇人同我分擔，甚至係無人同我傾偈……我要自己同自己講嘢。嗚嗚！……我真係唔係咁tough㗎咋！……我真係唔想再咁撐落去囉……

[電話對話]

Amanda媽:   Amanda? 媽咪啊！你澳洲個舊同學寄咗個包裹嚟俾你呀，我聽日拎過嚟俾你好唔好？

Amanda:   唔使喇！遲啲出嚟食飯先喇，應該都唔急嘅。

Amanda媽:   咁你幾時先得閒過嚟同我食飯呀？幾個月冇見過你喇！連Whatsapp都冇個。

Amanda:   我呢排真係好忙呀嘛。

Amanda媽:   你有幾時唔忙㗎？

Amanda:   唉，下個月細佬生日咪見囉。

Amanda媽:   不如我煲啲湯拎過嚟俾你飲好唔好呀！

Amanda:   唔使喇，咁遠水路你拎到過嚟，我又唔得閒陪你，唔通放低咗啲湯就走咩？

Amanda媽:   我冇所謂㗎喎，我轉一次車就過到嚟㗎啦。

Amanda:   唔使喇，一陣間你血壓高，喺中途暈咗咁點算呀？

Amanda媽:   我知，你都係唔想見到我啫。

Amanda:   (嘰咕着)見到面咪又係嗌交，有乜好見喎！……得啦，細佬好快生日㗎喇。

Amanda媽:   好啦，好啦，咁你約咗細佬未啊？

Amanda:   得啦，得啦，到時Whatsapp你啦。Bye bye!

[電話掛線]

Amanda:   唉，真係救命啊！(感慨)……唔知一個正常嘅家庭生活係點嘅呢？我真係想像唔到呀！我諗，我應該永遠都唔會知道㗎喇！

[電話對話]

樂:   Hi! Amanda! 原來呢你屋企附近有一個祈禱會呀，啲members大部分都係同校醫科嘅畢業生，同埋佢哋啲屋企人，所以呢大部份都係醫生嚟㗎。佢哋聽晚有個聚會你得唔得閒一齊參加？

Amanda:   hm……吓？咁呀？你會陪我一齊去㗎可？

樂:   梗係啦！Of course.

Amanda:   咁好啦，橫掂聽晚我都off。

樂:   咁我轉頭send個地址俾你啦，聽晚見！

Amanda:   Ok Thanks, 聽晚見啦！

[場景 - 聖堂 - 活動室]

Luke:   Hi, Amanda, 阿樂！歡迎你哋嚟我哋個祈禱會，我叫做阿Luke，係大打雜，哈哈。

Amanda & 樂:   Hi, Luke!

Luke:   你哋隨便坐吓得㗎喇！

Amanda & 樂:   ok, thank you!

Luke:   其實我哋祈禱會嘅成員呢我哋大家都識咗好耐㗎，好似一家人咁。聚會都好輕鬆。首先大家呢會唱幾首歌，分享吓近況咁啦，尤其係有啲咩同天主相遇嘅經驗，之後呢就一齊讀聖經，做聖言分享，神師會喺分享當中有教導，最後就係彼此代禱嘅時間，每個人都會將自己嘅祈禱意向講出嚟，然後所有人就一齊為佢祈禱。

樂:   嘩！好豐富呀！我都未參加過呢種嘅祈禱會添。

Luke:   我記得呢你話你係聖母軍呀嘛，我哋開會嘅形式係有少少唔同嘅。

樂:   其實我都係BB嚟㗎咋，有機會去體驗一吓唔同嘅團體，開吓眼界，其實都幾好呀！

Luke:   唔緊要！我哋大家都係BB嚟㗎，其實大家都係一家人嚟啫……係啊！呢度有少少飲品同埋啲茶點！唔好客氣呀！啊，神父喺嗰邊我介紹俾你哋認識吓……神父！呢位係阿樂，呢位呢係Amanda，佢哋今日嚟參觀嘅……

眾人:   感謝主，讚美主！

Ruth:   誒！到我！到我！我有讚美報告！

Luke:   哈哈！Ruth，冇人敢同你爭呀！你講先啦！

眾人:   哈哈……

Ruth:   嘩，我真係唔講唔得呀！哈哈！我啱啱呢自己一個人回流返嚟，冇親人喺身邊，本來都真係有少少擔心㗎，但係天主就真係咁好呀……

Luke:   邊個有紙巾呀！……遞俾Ruth俾佢呀……

Ruth:   ……天主派咗好多小天使……唔該……喺我身邊，有身邊嘅同事啦，同埋朋友啦，全部都對我好好，煲湯比我飲啦，唔開心嘅時候又開解我喔……我好感受到我喺佢哋嘅身上感受到天主對我嘅關懷，同埋愛呀……

眾人:   感謝主，讚美主！

Luke:   Thank you, Ruth! 唔單止咁呀，你仲有我地一班兄弟姊妹，我哋會車輪Send message俾你，同埋搵你食飯㗎喇，問你驚未？

Sarah:   哈哈哈，大家呢千祈唔好得罪阿Luke呀！哈哈！好喇！輪到我喇！我呢就好感恩嘅，因為呢我終於有機會停落嚟，去做咗一個八日嘅避靜，唔單止身心靈都得到好充分嘅休息，好難得嘅就可以喺寧靜之中做到一啲比較有質素嘅祈禱，可以聆聽天主嘅聲音。平時呢每日生活都咁匆匆忙忙咁，時間表呀都係塞到密密麻麻，真係插針都插唔入呀。就算能夠抽到啲時間出嚟，個心都係好似唔夠靜嘅。

Luke:   各位啊！神父曾經講過， St John of the Cross 有句名言: “Silence is God's first language”, 靜默係天主嘅第一語言。正如頭先Sarah講，唔係外在嘅環境有冇噪音嘅問題，個腦呢有事真係太多嘢諗喇，個心太多掛慮，我自己都有試過喺聖體面前跪足一粒鐘，個腦都仲係狂諗嘢，根本就冇將個心思放喺天主度。

Ruth:   係呀，Luke, 我哋祈禱嘅時候真係要放低所有嘅牽掛，收斂心神，返返去自己心靈嘅深處，耶穌就喺嗰度等緊我哋同佢促膝談心。正如瑪竇福音第6章第6節，耶穌囑囑咐門徒咁話:「至於你，當你祈禱時，要進入你的內室，關上門，向你在暗中之父祈禱，你的父在暗中看見，必要報答你。」

眾人:   主佑！下次見。

Amanda & 樂:   Thank you, bye~

[聖堂外 - 回家路上]

樂:   點呀，覺得點樣呀？

Amanda:   都幾得意呀！啲人都好nice喎！

樂:   我都係第一次去之嘛，我覺得佢哋啲人真係超級open，對住我哋兩個陌生人呢，都可以毫無顧忌咁分享啲好deep嘅嘢。

Amanda:   哈！我覺得呢你都有佢哋嗰陣「除」呀。

樂:   (聞吓自己) 咩「除」呀？

Amanda:   嗯，你哋肯定係嚟自同一個星球嘅外星人嚟㗎。

樂:   哈哈！E.T.? Alien?

Amanda:   你哋嗰啲說話用詞，思想態度都好似喺同一間廠出嚟咁嘅，仲都會發出同一種光，同一種氣場呀。

樂:   喂，我同你一樣，都係第一次見佢哋咋喎。

Amanda:   不過你哋呢一種光真係好吸引，我就喺度諗，你哋嘅secret究竟係乜嘢呢，有啲乜嘢係你哋有，而我冇嘅呢？……頭先我聽緊分享嘅時候，我發現你哋係外星人呀，因為你哋嗰對眼同我嘅構造係唔同㗎。你哋睇到嘅嘢，同我睇到嘅嘢係唔一樣㗎！

樂:   嘩，果然係大醫生！你梗係有內置X-Ray睇得穿我對眼嘅構造，犀利！犀利！

Amanda:   頭先阿Ruth分享佢同事煲湯俾佢飲，同埋喺佢唔開心嘅時候有人開解佢，我突然間諗起，其實，同樣嘅事情都發生過喺我身上㗎，但係，我唔單止唔會諗到係咩天主呀派啲咩天使嚟我身邊，我更加冇好似佢哋咁，因為感受到被愛而感動，我反而覺得嗰啲人好煩啦，阻住哂啦，又或者係我覺得佢哋係理所當然㗎。嗯……我從來都冇睇到呢啲就係愛。

樂:   (故作正經地) 歡迎你申請移民嚟我哋嘅星球！

今日反思

1. 你曾否試過感到孤單？遇到困難時也總是自己一個咬緊牙關面對？真的沒有人幫助你，和你同行嗎？你有否試過找耶穌來陪伴你？試過放開手，讓耶穌來幫忙呢？
2. 你認為幸福是什麼呢？那你幸福嗎？
3. 你身邊有天主派遣的天使助佑你嗎？他們是誰？他們怎樣照顧幫助了你？
4. 你有定期做避靜的習慣嗎？為什麼呢？
5. 你有習慣在寧靜中祈禱，收心斂神，全心一意，只與天主談心嗎？那經驗是怎樣的呢？你願意嘗試嗎？

每日聖言

「在我一生歲月裡，幸福與慈愛常隨不離；我將住在上主的殿裡，直至悠遠的時日。」(詠23:6)

每日禱告

慈愛的天父，感謝祢讓我明白到祢的愛是這樣無微不至。在我傷心的時候，祢派人來安慰我；我身體需要滋養的時候，祢派人來照顧我。我原本就一無所缺，但因為我看不出祢的旨意，把祢的愛都一一拒諸門外，使我的心靈都乾枯得要死。因為我只將目光放在我得不到或者失去的人，事，物上，是我的執著關閉了我的心門，是我的怨憤遮蓋了我的眼睛。

求祢派遣聖神來到我心中，開啟我心靈的眼目，讓我不但能看到祢在我生命中的足跡，在日常生活中經驗到祢的臨在，更把祢沛降給我的愛完完全全地接收。求聖神教我如何祈禱，好讓我能在寧靜中與主神交密談，聆聽天主愛的話語。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - 醫院 - 員工休息室]

Amanda:   (自言自語) 如果呢個世界上真係有天主嘅話，佢一定唔會係好愛我喇，如果唔係，點解我會有一個咁嘅屋企，俾我遇上咁多傷害我嘅人，而到最後都得唔到幸福吖？……(怨憤) 乜我真係咁差？咁唔值得被愛咩？

蓮姐:   阿黃醫生，你咁夜先至食飯呀？陰公囉！因住餓壞你個胃呀！忙都要準時食飯先得㗎嘛，醫生。

Amanda:   係呀蓮姐，今日比較忙呀！

(抹枱，拿起杯來放在枱上)

蓮姐:   嘩！咁大杯咖啡！好燥㗎！哎呀！你又要捱夜！……我聽日煲啲雪梨水過你飲！聽日你返工個呵？

Amanda:   (不耐煩) 唔使麻煩你喇，蓮姐！……我OK㗎喇！……我唔阻你清潔喇，我出返去做嘢先。

蓮姐:   你唔唞多一陣先？我好快搞掂喇！唔嘈住你喇！……

Amanda:   唔係唔係，我夠鐘喇，你慢慢啦！拜拜蓮姐！

Amanda:   唉，想自己一個人靜吓，飲杯咖啡，都唔得嘅？

李姑娘:   黃醫生，有個病人佢突然間冇哂呼吸心跳，已經幫佢做緊CPR㗎喇，你可唔可以過嚟睇吓？

Amanda:   陳醫生呢？而家呢個時間係佢當值㗎喎？

李姑娘:   咪係囉……我哋搵勻成個樓層呀兼連埋洗手間都唔見佢，所以咪過嚟休息室搵你囉。

Amanda:   有冇搞錯呀？咁唔負責任嘅？你叫同事繼續call佢！AED ready？ 

李姑娘:   應該用緊……

[場景 - 醫院 - 會議室]

Amanda:   James, 已經唔係第一次㗎啦！陳醫生喺佢當值嘅時候就唔見咗人，有突發事啲姑娘就周圍搵佢都搵唔到……

James:   Amanda, 你睇吓你，咁emotional嘅一啲都唔得專業，你咁衝動又唔夠冷靜，喺危急嘅時候又點能夠做出適當嘅決定呀？Robert, 對於Amanda嘅提問，你有咩回應啊？

Robert:   我因為有啲緊急嘅需要去咗洗手間！

Amanda:   講大話！啲姑娘話，去咗washroom搵你都搵你唔到！

James:   Amanda, 你再係咁，我會請你離開呢個會議㗎啦！

Amanda:   James, you are head of the department! 而家係陳醫生喺度違返專業守則，我只係報告呢個情況，你唔單止怪責我，仲要我離開會議，哼！請問究竟係用乜嘢邏輯，同埋根據乜嘢守則呀？

James:   Amanda……

Amanda:   喂你唔使再講啦James，既然我個人，我嘅說話，連同我啲醫護人員專業守則，喺呢一度都係咁不被受尊重嘅話，我再留喺呢個會議度都冇意思啦，……失陪喇，咁多位！

[場景 - 醫院戶外地方]

Amanda:   (自言自語)點解從來都無人肯聽我講嘢嘅？點解我講嘅說話咁無力？點解冇人尊重我？無人欣賞我嘅？佢哋寧願相信嗰個毫無專業操守，當值時間吞泡嘅人，都唔相信我！

Candy:   Amanda, 嗱！紙巾呀！

Amanda:   我有啦，Candy, 唔使喇。

Candy:   攞住呢包啦，你嗰隻唔夠韌呀！抹到成塊面都係紙巾喇！

Amanda:   係咩？邊度呀？

Candy:   誒，等我幫你啦！嗱，你拎住呢杯嘢飲住先喇。

Amanda:   Thank you, Candy! hm……係Mocha?!

Candy:   係呀，我知你都平時飲開Americano，但係我記得有一次，你又好唔開心，你買咗杯Mocha嚟飲，所以我諗你而家可能會想飲呢一個。

Amanda:   係呀，嗰次又係開完會囉……唉！(忍不住兩眼通紅)

Candy:   係啦諗吓諗吓，原來我哋都做咗好多年同事啦喎？有冇7年呀？

Amanda:   好似6年多啲啦！唉，真係心淡呀！

Candy:   其實全個Department都知道你好有衝勁同埋熱誠，所以遇到有咩事，如果你喺度，啲姑娘都會即刻嚟搵你求救呀。

Amanda:   係嘅，有事嘅時候咪識得搵我囉，擰轉背咪又就係喺度講我壞話！咁多年嚟，俾我唔覺意聽到嘅都唔止一次啦！

Candy:   哈哈，唔好太在意人哋講乜嘢喇！其實我哋真係冇辦法控制到人哋點諗我哋，我哋知道自己係點就得啦。

Amanda:   心淡嘅唔單止係努力同埋付出好似得唔到啲乜嘢認同咁，而且成個Department咁多人，唔計啲姑娘，淨係醫生都有好多個，但係總係覺得自己好似係孤軍作戰咁，有時聽到啲同事之間話一齊約去食飯呀，或者約埋去做啲乜嘢咁，從來都冇我份㗎。

Candy:   Amanda, 其實大家淨係工作已經筋疲力盡，好似我咁吖，屋企仲有小朋友嘅就更加唔會出嚟玩啦，有啲同事喺讀書嘅時候就已經係同學嚟㗎喇，咁佢哋就梗係會friend啲啦，友情嘅嘢好講緣份嘅，冇得強求㗎，隨緣啲，輕鬆啲，令到自己同其他人都舒服啲。

Amanda:   係嘅！冇期望咪唔會有失望囉！

Candy:   人同人之間嘅關係，係好微妙㗎，有好多嘢我哋都控制唔到。有時一個溫柔接納嘅眼神，一個善意嘅微笑，可以化解好多嘅誤會，甚至可以令人覺得人生充滿希望。相反呀，一個討厭蔑視嘅表情，唔單止可以引起衝突，甚至真係可以摧毀一個人嘅生命㗎。

Amanda:   你意思係？！……

Candy:   hm……嗱……老實講呀，雖然我明白你內心可能有好多怨憤同埋痛苦。但係，喺你面上邊又經常都掛住一副冷漠高傲又或者充滿敵意嘅神情，有時又真係幾嚇怕人㗎。

Amanda:   Candy, 連你都覺得我係個咁嘅人？

Candy:   並唔係我諗你係一個點樣嘅人呀，而係你個樣會令到人誤會你呀，同埋覺得好唔舒服。好似頭先開會嗰陣時咁，如果你可以用啲溫和啲嘅語氣同埋態度，可能氣氛就唔會搞到咁僵啦。況且大家都係同事，除咗工作上互相補位之外，儘量互相包容，互相體諒，可能人哋有苦衷呢？

Amanda:   其實我都知道頭先我喺激動咗啲嘅！但係阿James咁樣鬧我，我真係覺得好委屈吖嘛！

Candy:   唏！我明嘅！我都知你明我講咩嘅！誒，唔好喺度吹風喇，快啲返入去喇。

[場景 - 醫院 - 走廊]

Amanda:   (自言自語) 咦，阿樂個voice message喎。

樂:   Hi Amanda! 呢個呢就係講好咗嘅每日阿樂分享！今日想同你分享一個好出名嘅聖經故事叫做蕩子回頭(路加福音15:11-32) 我send咗條link俾你㗎喇，你可以自己慢慢再睇。我想同你分享呢個故事呢，係因為我就係當中嗰個細仔，嗰個蕩子呀！嗰個感動位就係，我返到天父爸爸身邊嘅時候，佢完完全全，無條件咁寬恕咗我。我感受到佢完全嘅包容同埋接納，因為佢對我嘅愛呢根本就係無條件嘅，無論我曳定係唔曳，聽唔聽佢話，佢一樣係咁愛我。呢份被寬恕嘅感覺呢實在太好，所以呢，我以後就更加容易去體諒同埋寬恕其他人。寬恕其實係一種愛嘅表現嚟㗎。你試吓喺生活中寬恕嗰啲得罪咗你嘅人，如果你做唔到嘅話呢，就試吓祈禱啦，請天父俾力量你。你會發現寬恕咗人哋之後，其實得益嗰個係你自己嚟嘅，因為自己會開心咗好多。如果你有時間就send個message同我分享吓你寬恕人嘅經驗，或者，睇呢個蕩子回頭嘅故事嘅感受啦。主佑！

Amanda:   (陷入深思) 吓？！要我無條件咁寬恕佢哋？……

今日反思

1. 你有否曾經質疑天主對你的愛？特別是當遭遇不幸的時候？
2. 你認為天主愛你嗎？可有什麼憑證？
3. 你有否曾經試過在工作環境或其他團體感受到被輕視，不尊重，不接納呢？你如何反應？
4. 你有否試過在所屬的團體中，感到自己不受歡迎，其他人都不熱衷於跟你交往，甚至被排斥？你的感受如何？你如何面對呢？
5. 如果你有曾經遇上以上兩個情況，那麼你有試過找耶穌幫忙，或者默想祂的苦難嗎？為什麼呢？
6. 你有否試過無條件寬恕得罪你的人嗎？例如包括：不會罵他一頓作發洩，或將他的惡行公諸於世……等等。為什麼呢？
7. 你有被別人寬恕的經驗嗎？那個經驗是怎樣的呢？

每日聖言

伯多祿前來對耶穌說：「主啊！若我的弟兄得罪了我，我該寬恕他多少次？直到七次嗎？」耶穌對他說：「我不對你說：直到七次，而是到七十個七次。」(瑪18:21-22)

每日禱告

慈愛的天父，感謝祢讓我明白到祢對我的愛是無條件的，我得罪祢，祢寬恕我，在一切不幸和困苦中，祢陪伴我，將恩寵及平安賜給我，使我能安心在祢的愛內成長，因為只有愛，才能改變人心，使人變好。求祢派遣聖神來到我心中，賜給我敏銳的觸覺及洞察力，使我能在生活中，在我身邊的人，事，物身上經驗到祢對我的愛。主耶穌，感謝祢為愛我承受了各種苦難，讓我遇上痛苦時可放心投靠祢，因為我知道祢會明白我。求祢賜我堅忍，使我在面對困難痛苦的時候仍能對祢充滿信心。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - coffee shop]

Waiter:   小姐請問幾多位？

Amanda:   兩位！

Waiter:   小姐呢邊吖！

{看見鄰近有張比較寬敞闊落的}

Amanda:   err……(命令式) 唔該，我可唔可以坐嗰邊張卡位呀？

Waiter:   err……好啦，你等一陣，我執好咗先至俾你喇！

Amanda:   誒！等陣！窗邊嗰張啱啱起身，我都係轉去嗰邊喇，唔該！

Waiter:   (少許不耐煩) 你……決定係坐嗰張啦嘛？！

Amanda:   係呀，麻煩你執執俾我喇！

Waiter:   (少許晦氣的) 好……你等等啦！

樂:   Hi, Amanda!

Amanda:   Hi! 

樂:   你今日off？

Amanda:   我今晚on call，一陣仲要返去

樂:   你幾時轉咗嚟呢間醫院㗎？ 

Amanda:   都轉咗好耐㗎喇……同Joseph分咗手後冇幾耐就轉咗過嚟喇。

樂:   咁都有五六年啦喎！

Amanda:   呀係呢，Joseph佢點呀？

樂:   Joseph佢點？你咁多年都冇搵過佢㗎？

Amanda:   hm……no

樂:   OK……我明嘅，可能唔搵都係件好事……佢而家好好呀，舊年啱啱結咗婚。

Amanda:   (心情複雜，少許失望) 哦，係呀？！……咁咪好囉！

樂:   咁你呢，你又點樣呀？

Amanda:   都係差唔多啦，你知我份工係好忙㗎嘛……

樂:   哼！我記得！老實講真係唔係咁多人呢會用工作忙嚟做分手藉口……Joseph真係好耐都過唔到……佢諗極都諗唔明，佢究竟做錯咗啲乜嘢……

Amanda:   (後悔) ……Joseph……佢好好……佢冇做錯啲乜嘢呀……

樂:   Exactly! ……你知佢好愛你㗎呵？！

Amanda:   我知道……

樂:   咁……點解呀？

Amanda:   ……wrong timing囉……我承認我係有啲後悔……我嗰陣時唔係好識得欣賞佢……而家已經太遲啦……

樂:   Bingo! 我哋估到㗎，你嫌佢悶呀嘛！你嫌佢唔係啲咩專業人士，又搵唔到錢呀嘛……你覺得你會搵到個好過佢呀嘛，係咪呀？！

Amanda:   ……咁唔去拍多幾次拖……唔比較過又點先知道……佢係咪最好喎……

樂:   哦，Amanda, Joseph係人嚟㗎！同你拍過拖俾你飛咗嗰啲呢，全部都係人嚟㗎！……而家唔係買衫呀！唔係呢俾你逐件逐件試上身，試到啱喇，先至買最靚嗰件㗎！你有冇諗過其他人嘅感受㗎？你知唔知咁樣hurt到人㗎？

Amanda:   喂……咁唔係一拍拖就要結婚㗎嘛？！……一生一世嗰喎！梗係要認真啲揀㗎啦！

樂:   Amanda, 你知唔知自己想要啲乜嘢㗎？除咗天主，冇嘢係完美㗎喎！你都唔可以試完一百件衫之後轉過頭買返第一件㗎！錯過咗，就係錯過咗，返唔到轉頭㗎喇。

Amanda:   (無奈)……Well……咁而家講咩都無用啦，一切都已經太遲……唉……我而家咁嘅年紀仲邊度有得揀呀……

樂:   Who knows? 個重點係，你要知道愛情同shopping係兩回事嚟㗎。

Amanda:   ……right, OKOK……可能我大概明你講啲咩嘅！……

樂:   (回復平靜) Joseph係我嘅best friend，你搞成佢咁，……俾著喺之前嘅我，根本就當你係仇人，真係唔會同你講咁多嘢囉……

Amanda:   呀……你講起我又覺喎，你好似真係同以前唔同咗，究竟你發生咗咩事？

樂:   咁你覺得我有咩唔同咗？

Amanda:   你成個人嘅氣場都唔同咗！嗰日我喺診症室見到你照顧嗰個阿伯嘅時候我就已經覺得㗎喇……

樂:   哦，嗰個財哥係我返嗰間聖堂嘅教友嚟嘅，佢中咗風，我係義工，咁咪負責幫佢買吓嘢，陪吓佢覆診咁囉。

Amanda:   哦，原來你返咗教會……

樂:   係呀……感謝天主！係佢主動嚟搵返我呢隻走失咗嘅羊。以前我即使擁有好多嘢，好似好幸福咁，連我自己都覺得，我有乜理由唔開心嘅唧？……但係就係咁，先更加痛苦！

Amanda:   係呀，以前嘅你真係幾生人勿近㗎！成日都燶口燶面㗎喎！

樂:   係呀，真係到返返教會之後先至真正明白乜嘢係真正嘅快樂，同埋我心裡面一直追求嚮往嘅係乜嘢？

Amanda:   咁係咩？

樂:   哈哈！……係愛囉……

Amanda:   (大惑不解) 咩話？真正嘅快樂係愛？

樂:   係啊，冇愛根本就唔會有喜樂，係真愛喎，唔係Affection喎，係嗰啲為人犧牲同埋付出嘅大愛，只有真心為別人嘅好處而作出無私嘅奉獻先至可以帶嚟真正內心嘅平安同埋喜樂……

Amanda:   你而家講嘢啲口吻真係好Catholic，好重教會味呀……

樂:   哈哈！你講得冇錯呀！呢個係我哋嘅Signature style! ……但係我哋唔係特登個喎，信仰嘅嘢係生活，唔係knowledge，言語好有限嘅唧，好難表達，係personal relationship with God。雖然一時之間呢，你會覺得好難理解咁樣，我都係親身經歷過之後呢，有第一身嘅感受先至慢慢get到，但係簡單嚟講，就係要去愛同埋付出先至會快樂。

Amanda:   OK, 但係你講嘅嘢呢喺邏輯上係有問題㗎，首先，明明係渴望得到所以先去追尋，但係就變咗調翻轉頭要自己俾出去喎，咁自己都冇，邊度有得俾呢？而且淨係一味付出，係會乾塘㗎。

樂:   誒，你講得啱呀！所以呢唔係淨係付出㗎，應該話係一個愛嘅流動，呢份愛嘅關係，係循環不息嘅，並唔係由我哋開始先，係天主先愛咗我哋，係耶穌先為咗愛我哋而犧牲，而我哋要留喺佢呢份愛裡邊，我哋先有力量好似佢咁犧牲自己去愛其他人。

Amanda:   嗱嗱嗱……雖然喺理論嘅層面，我係明白你講啲乜嘢。但係，對於我嚟講，一啲都唔practical，我意思係，我真係想像唔到實質上係點樣可以做到，hm……好似好離地咁囉。

樂:   哈哈，係㗎！呢啲嘢真係唔係三言兩語可以講得清楚，不如come and see，一齊嚟親身體驗吓囉？

Amanda:   點體驗呀？跟你返教會？Come on, 你知我啲時間係唔會返到你哋啲聚會嘅！

樂:   係！我明白你未必可以返到我去開嘅團體，但係我都可以同你一齊去揾下你屋企附近嘅堂區又或者有冇其他團體㗎。嗱！咁啦，喺我幫你搵到適合你嘅團體之前，我就暫時做住你個buddy先啦，每日我都會send一啲靈修嘅資料，同埋我自己嘅反省俾你，你咪試吓喺日常生活中應用出嚟囉，當你遇到啲咩問題嘅時候，我哋又可以傾吓，咁樣好唔好？

Amanda:   Wow! 你果然真係成個唔同哂喎！

樂:   哈哈！係呀，我都想像唔到自己會做啲咁嘅嘢！

Amanda:   {看看錶} 哎喲！咦？唔得啦，喂，我都差唔多要走啦！阿樂，老實講，雖然我唔係好明你頭先講嘅係乜嘢！但係我都好想去睇吓，去了解吓，因為單單見到你竟然可以由一個黑面神變咗一個樂於助人嘅陽光男孩，呢件事本身就已經好夠吸引力。

樂:   哈哈，連我自己都覺得好匪夷所思，以前就俾人叫羊仔，而家又俾人叫做陽光男孩，真係救命啊！發夢都冇諗過呀！

Amanda:   哈哈，你放心，你唔係beach boy嗰種，係……嗯好似識發光咁。Ooops! 我真係要走啦，bye陽光男孩~~

今日反思

1. 你以為基督徒對「愛」是如何定義的呢？你都認同嗎？
2. 你有在日常生活中實踐出來嗎？
3. 你認為一個內心充滿愛的人是怎樣的呢？從外在能看得出來嗎？
4. 你願意成為這樣的人嗎？
5. 你有試過跟別人分享基督徒對愛的看法嗎？
6. 你有試過去愛一個你不喜歡，亦不願意去愛的人嗎？為什麼呢？那經驗是如何的呢？

每日聖言

「你們若只愛那愛你們的人，你們還有什麼賞報呢？稅吏不是也這樣作嗎？你們若只問候你們的弟兄，你們作了什麼特別呢？外邦人不是也這樣作嗎？」(瑪5:46-47)

每日禱告

慈愛的天父，感謝祢讓我明白到愛並不是一種感覺，也不是激情，是一種為了別人的益處而犧牲自己的能力，是一種內心的自由。求祢派遣聖神，來到我的心內，使這顆在我被造時已放在我內的，愛的種子，能夠發芽生長。讓我都能藉著放低自己的感受及需要，去為身邊的人付出，而表達我對祢的愛。聖神呀，求祢降臨，賜給我勇氣及力量去愛那些我不想愛的人！使我都能藉著遵守主耶穌的誡命，去愛，就像祂愛了我一樣，而成為祂的朋友，並存留在祂的愛內。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

Eric:   歡迎大家來到收聽我們這個網上靈修節目，生命恩泉將臨期的網上靈修2023。今天我們的主題是「喜樂」。坐我前面的一位年青人。我很想知道你當教友的年齡？還没介绍，你的名字是？

Ita:   我是Ita。

Eric:   Ita 你好。妳的教齡是多少？

Ita:    哇！要暴露年齡，我是嬰兒领洗。

Eric:   噢，我特意問你教齡。是啊，你是嬰兒领洗。我想女士不要問年齡。我不問教齡！你是個年青人，嬰兒领洗是很重要的指標。你家裏都是教友嗎？

Ita:   是。

Eric:   是怎樣？

Ita:   爸爸媽媽和親戚都是教友。外婆都是。我是第三代教友。

Eric:   整個家都充滿信仰氣氛，是嗎？

Ita:   是。

Eric:   你在這種環境下成長。我們今天的主題是「喜樂」。是不是因此所以你覺得做教友一出生就是有一種開心，喜樂，愉快？

Ita:   當初没有這個感覺。但是我覺得在聖堂内的團體的確帶給我很多喜樂。在團體内成長讓我感受很多愛和喜樂。

Eric:   團體 ……你参加什麽團體呢？

Ita:   我的堂區是特别。我們的堂區在屯門。堂區很小。全部教友有兩至三百個。所以很像一個家。我們會知道這星期這一家人來了，這一家没有來。真是很家庭式的教會。這個氛圍讓我覺得很有愛，很充滿喜樂。

Eric:   現在年青人很少在教會出現。我想你是少数。

Ita:   都算是。同齡的教友很多已離開。

Eric:   你為什麽不走？

Ita:   那是可能因為我在聖堂裏擔任司琴這個職位。一直在音樂之中和天主有一份關係。一路有上主陪伴這份信仰。直到我差不多18歲的時候參加世青 (世界青年節)，還去了泰澤，感覺大開眼界。天主可以透過那麽多不同的方法去告訴我們祂怎樣愛我們。怎麽觸碰我們，真的讓我很大開眼界。

Eric:   這兩次的經驗讓你很感覺到和天主有一份很近距離的觸碰？

Ita:   是，尤其我去世青之前我去了意大利亞西西。聖方濟這位聖人充滿喜樂。他和大自然接觸。這個特點和我很相似。見到那些樹枝好像伸開手搖擺，我覺得好像和天主在一起，讚美天主。在大自然中我感受到那份喜樂。和我的連結。我覺得在天主眼中，我還想做一個小朋友。雖然我現在長大了，我依然很想保持著小朋友那份的喜悦。

Eric:   有什麽點子，在妳幾次的經驗中，意大利亞西西好，世青也好，泰澤也好，有没有讓你覺得很觸動？剛才你說和天主的觸動？

Eric:   有哪一些地方讓你感受特别深刻？

Ita:   世青之後，還没有甚麽感受，那時候我還很年青。之後去了外國讀書。很長時間，7年。當時的信仰活動，只是一位主日教友。雖然在外地我也有幫忙彈琴，但真的没有很多靈修活動。轉捩點是我留學後回來，媽媽便過身。媽媽在家裏是一個信仰的支柱，家庭的支柱。很多的愛是從她那裡轉發给其他人。媽媽過身後，我好像要擔當照顧家庭的角色。當時又遇上疫情，感到很困難。我要做飯，又不能去聖堂。我覺得那份喜樂是讓我在這個生活中很想再尋找天主。直到今年，我在想，媽媽過身後我發展了一段異性關係。男朋友對我很好。他帶我品嚐很多美食。可是到了一個地步我覺得懷疑，為什麽我不滿足？不感到很喜樂？常吃美味的東西。又到處遊樂。之後我發現原來我很渴望，很想找到天主。今年我在一次偶然機會朝拜聖體。朝拜聖體時我也是幫忙彈琴。天主很有意思，所有的召叫都是讓我去彈琴。無論什麽活動，我都参加，接觸不同的人。我在朝拜聖體中心那裡彈琴。我彈琴的時候，當聖體降福時，神父向每一位教友降福。我一邊彈琴一邊哭。天主的愛像傾倒在我身上。我從沒有經歷過那麽强烈的被天主的愛充滿。我發現那一刻我更有力量把愛分享给其他人。我發現這份分享是我真正想要的喜樂。

Eric:   好像恩寵滿溢一樣。

Ita:   是啊。

Eric:   你被充盈到一個點，你很想分享出去，是嗎？

Ita:   是啊，然後我發覺原來我的喜樂源於分享愛。和年青人一起在團體内作分享。所有都是與團體生活有關。我發現我在團體生活中很能找到我的喜樂。

Eric:   因為在團體裏你可以和人分享，是嗎？

Ita:   是。

Eric:   可以和别人說你那份喜樂，透過音樂，原來音樂是一個媒介。好像天主和你的接觸，是透過音樂，對吧。連線在當中。

Ita:   是。

Eric:   剛才我們分享了你媽媽過身。你覺得那一段經驗是很艱辛，是嗎？自己要背負起很多事情。很難渡過。

Ita:   我覺得很神奇。天主讓我不覺得很艱辛。因為祂给了這份勇氣給我們去面對困難，因為個信仰。事後我覺得還是要去面對。當時有一個力量。我媽媽過身那一刻，其實我們全家人都很平靜。

Eric:   你說你媽媽的事件，令你很傷感，很難渡過。不過你又感覺到有一股力量。會不會，在這件事没有發生之前，妳和天主的關係是很好，是嗎？發生之後，你又站穩腳，你數算妳的恩典的時候，你發覺不是吃喝玩樂讓你開心。原來天主才是你真正喜樂的根源。這時候，你有没有覺得相比之下，妳和天主的關係是增益了或是相同？

Ita:   我覺得是增益了。我覺得整個生命不一樣。由今年的朝拜聖體被愛充滿的那一刻。

Eric:   人有時很有趣。你有更多的經歷。雖然那些經驗可能是痛苦，但這些經歷把妳和天主的關係拉得更近。把那些源於天主的喜樂加倍。我覺得很有趣。我想起一句話「痛苦是天主化妝的祝福」，是嗎？

Ita:   很美。

Eric:   天主的安排真的很神奇。那你現在還是繼續用天主给你的才華 ─ 音樂，在教會裡服務，是嗎？

Ita:   是。另外我想分享一個喜樂，那是音樂敬拜，我發現可以全心全力地唱歌讚美天主，在信仰裏是另一種喜樂。

Eric:   你也唱歌？你有彈琴和唱歌？

Ita:   是。敬拜讚美。我現在很喜歡繼續用音樂事工把喜樂帶给别人，把希望帶给人。

Eric:   很好。在整個過程與你聊天，你的眼睛總是水汪汪。是嗎？眼眶有點淚水。原來眼淚不只是痛苦。原來也有喜樂，充盈的時候，也可以是這樣。我自己都是，我是男士，我讀理科。在讀書的年代我是不懂得流眼淚。那時候去看電影，很感動的。坐在鄰座的觀眾已經拿紙巾擦眼淚。我在理性上受到感動，但是没有眼淚。然而人有很多經驗。後來經歷了一些事情，和天主的關係又有些不同的化學作用之後，我現在隨時可以哭。一秒鐘就能够哭。真的很有趣。我自己的反省是，原來這些經歷，正如剛才所說，痛苦是天主的祝福。這些和天主的相遇，越相遇越親近的

感覺，我相信讓人更知道，我們的生命原來抓住耶稣，抓住天主，是最安穩。

Eric:    很好。很感謝妳的分享Ita。

Ita:   多謝Eric。

[場景 - clinic]

財:   阿樂呀，阿Grace最終都冇收到你條手鏈呀？

樂:   (尷尬地) 冇呀！其實係我唔夠細心啫，冇留意到佢平時其實都冇乜戴飾物，一心以為個個女仔都會鍾意呢啲嘢。

財:   哦，阿樂，只係阿Grace特別唔同啫。

樂:   係呀！Grace唔單止唔追求食好嘢，佢對其他物質嘅享受好似一啲渴望都冇，但係佢最得意嘅地方就係，當佢食到好味嘅嘢食，見到啲靚嘅嘢嘅時候，又會好開心好感恩喎。

財:   哈哈哈！係呀，呢個得意妹呀，成日都笑㗎，真係見到佢就開心呀。

樂:   係呀！阿Grace嘅喜樂並唔係嚟自擁有啲乜嘢，而係發自內心，對人嗰份愛，嗰份同天主嘅關係。

財:   Grace真係好好，穿針引線等你同天主修和呀……

樂:   係呀！嗰次之後，我就正式返返教會呢個大家庭喇。

財:   好喇，你呢個悔改皈依嘅故仔就大團圓結局啦。咁你個愛情小故事呢？你同阿Grace發展成點呀？

樂:   (尷尬地) hehe……財哥，其實由頭到尾，呢個都係一個尋找天主，尋找喜樂嘅故事嚟嘅。又或者咁樣講啦，係天主拯救我呢隻迷途小羔羊嘅故事嚟嘅……故事到咗高潮亦都去到尾聲喇，……嗰晚攞住阿Grace俾我嘅修和聖事小冊子，第一次祈禱，做省察，回顧咁多年嚟喺我生命中得罪天主的地方，嘩！真係好震撼，好驚嚇，我好認真咁續條續條問題反省，過咗一陣之後，發現塊面開始有少少暖暖，濕濕哋咁樣……好耐都冇流過眼淚……唔單止發現自己原來係一個咁差嘅人，而且終於解開咗心裏面咁多年嚟嘅困惑……我嗰陣時終於明白點解我一直都咁唔開心……

(回憶中，回到過去)

[場景 - 聖堂]

{在聖體櫃前面Grace跪著祈禱}

樂:   阿Grace呀，你都辦告解嘅？

Grace:   我上星期辦咗喇，下個星期先至再辦，我通常開會之前都鍾意喺度朝拜聖體。

樂:   係咩嚟㗎？

Grace:   哈哈哈，都話你係羊仔嚟啦……

樂:   咩~咩~

Grace:   ……OK……喺呢個櫃裡面放咗耶穌嘅聖體，即係話耶穌就喺裡面，所以我好喜歡嚟到佢面前，同佢見面，同佢傾偈。

樂:   咁你通常同佢傾啲咩㗎？

Grace:   咩~都傾㗎(哈哈)，例如感謝佢賞賜俾我嘅禮物啦，喺生活上遇到嘅一切好人好事，我都會同佢分享㗎，我所見到嘅，經驗到，所有美麗美好嘅事物，我都會讚美佢……亦都會為其他人代禱，亦都同佢傾訴吓我嘅擔心，我關心嘅人同埋事，……hm……然後會靜靜咁，乜嘢都唔講，經驗佢嘅陪伴，細心用心咁樣聆聽佢嘅回應。

樂:   吓？你真係聽到佢應你㗎？

Grace:   哈哈！唔係隻耳仔聽到呀，係個心聽到呀！你可以試吓由默想聖經開始，天主會透過聖言同我哋講嘢㗎。

樂:   嘩！好高深喎！

Grace:   哈哈！一啲都唔高深，普通到好似朋友傾偈咁咋嘛，你試吓你就明㗎喇！

樂:   好啦，咁我都返去試吓啦……

Grace:   咦，神父嚟咗喇，你去辦告解先啦。

樂:   呀，好呀，陣間見。

[聖堂 - 堂區活動室]

{執拾物資，準備上車去兒童院}

樂:   阿Grace，呢箱使唔使搬呀？

Grace:   要呀要呀，呢箱係遊戲物資嚟㗎，同埋隔離嗰箱都要拎埋去兒童院㗎。

樂:   OK，我搬埋呢兩箱上車先，其它嗰啲都搞掂哂㗎喇，可以開車喇喎！

Grace:   係呀，唔該哂阿樂，我熄埋燈，鎖埋門就得㗎喇。

[場景 - 車上 - 去兒童院途中]

Grace:   阿樂，你頭先辦完告解嗱？覺得點呀？

樂:   (感恩感激) 好似好多年冇沖過涼，而家洗走哂啲老泥咁樣，覺得成個人都好似輕咗好多，好爽！多謝你啊，阿Grace。

Grace:   哈哈！感謝天主就真！其實悔改係天主嘅恩寵嚟㗎。

樂:   係啊，被寬恕嘅感覺真係好好，喺告解亭裡面當神父代表耶穌寬恕我嘅罪嘅時候，嗰一刻，我真係感受到一種被釋放嘅感覺，就好似一個好大好重嘅包袱，又或者頭頂上一嚿好大好大嘅石頭，而家突然間消失咗咁樣樣，俾人拎走咗，我終於可以自由咁樣呼吸……真係好感動，好感恩，好喜樂。

Grace:   (眼泛淚光，非常感動) 感謝天主，我都戥你好開心啊！犯罪係離開天主，本身就係最大嘅懲罰，因為冇天主嘅地方就唔會有喜樂，當我哋選擇犯罪，選擇離開天主，就等於選擇咗生活喺地獄之中，所有同愛相反嘅，自私，傷害人嘅行為都唔會令我哋快樂㗎。

樂:   Exactly! 所以只有當天主寬赦咗我哋嘅罪嘅時候，我先至能夠重新感受到嗰種同天主一齊嘅喜樂。

Grace:   Yes! 阿樂Congratulations! Welcome back!

樂:   Yeah~~

Grace:   咦，話咁快，我哋就到咗喇喎，陣間等我介紹個人俾你識啊。

樂:   好呀！呢度就係嗱？！

Grace:   我哋到啦！請大家準備好你嘅笑容同埋愛心，將天主嘅愛同埋喜樂同呢班小朋友分享啦！

[場景 - 兒童院]

Alex:   咦，阿Grace！好準時喎你哋！

Grace:   Alex! 等我介紹個人俾你識呀！佢叫做阿樂，係我哋聖母軍嘅新團員。

樂:   Hi, Alex!

Alex:   阿樂，你好，我喺呢度嘅社工……

Grace:   (甜蜜，得意地) ……同埋Grace嘅男朋友。

Alex:   係係係，冇錯，冇錯，呢個先至係我真正嘅身份。

Grace:   哈哈哈！算你啦！哈哈哈！我哋今日活動喺邊度舉行呀？係咪上次嗰個禮堂呀？上次呢，嗰個禮堂好似有其中一個mic唔係好work啊……

{回到現在}

[場景 - clinic]

財:   原來阿Grace已經有男朋友，唔緊要啦，阿樂，你仲咁後生，一定會遇到個好女仔嘅。

樂:   哈哈，感謝天主，其實當時我見到Grace嘅男朋友嘅時候，因為冇心理準備，都真係有啲突然嘅，但係個心就冇特別唔開心，見到佢兩個又甜蜜又合拍，淨係覺得佢哋真係好天生一對，於是呢我就明白喇，雖然我最初係俾阿Grace嘅喜樂吸引到，之後亦都好感謝佢將我帶返去天主嘅身邊，但係，我哋之間嗰種呢並唔係男女之間嘅愛情，我終於明白我心裡面想追尋嘅係從天上而來的喜樂……而我……已經搵到喇。

護士:   李有財，可以入嚟見醫生喇！

財:   好呀！唔該姑娘！

樂:   財哥，放番隻腳上嚟個踏板嗰度先啦。

財:   好呀，唔該阿樂！

護士:   推佢過嚟呢邊先啦

樂:   係，好呀，姑娘！財哥，呢度D冷氣呢好似凍過出面，你使唔使著翻件衫先呀？

財:   哦，好呀！

樂:   (驚訝，猶豫) {見到醫生好熟口面} Amanda?!

Amanda:   {看了看阿樂} (冷冷的) 請問阿伯你叫咩名啊？

財:   我係李有財呀，醫生！

Amanda:   你覺得點呀？有冇邊度痛？左邊身仲有冇邊度麻痹？

財:   覺得好好呀！有時隻左腳呢都仲有啲痺痺哋，仲唔係好聽話咁啦……

Amanda:   嗱，我會叫姑娘扶住你，你試吓由呢度慢慢行去嗰張診症床嗰度俾我睇吓……

財:   哦，好呀！

護士:   李有財，你慢慢起身，姑娘扶住你，唔使驚，試吓慢慢行啦……好……

財:   唔該哂你呀姑娘……

Amanda:   阿樂，我之後再call你！

今日反思

1. 你有「被福傳」的經驗嗎？重投天父的懷抱的感覺是怎樣的呢？
2. 你曾否試過將迷途的小羔羊引領返去耶穌的羊棧呢？這個經驗是怎樣的呢？你經常會這樣做嗎？爲什麼呢？
3. 如果你沒有試過，那是爲什麼呢？是有什麼原因使你卻步嗎？
4. 有否留意現在你身邊可有迷途的小羔羊需要人引領返去耶穌的羊棧呢？
5. 你曾否試過有人因為在你身上看見天主，感受到愛，或者被你的喜樂所吸引？
6. 你曾否試過將你的基督徒價值觀及世界觀與其他人分享呢？

每日聖言

「所以誰若在基督內，他就是一個新受造物，舊的已成過去，看，都成了新的。」(格後5:17)

每日禱告

慈愛的天父，感謝祢不但賜予我悔改的恩寵，寬恕我的罪過，讓我可以重新回到祢的身邊，更讓我明白只有留在祢的愛內我才會得到真正的喜樂，離開了祢，離開了愛，即使我得到世上所有一切，我卻會因此而賠上了我的靈魂，我不但沒有得著什麼，反而喪失了我原本就有，唯一最寶貴的東西，人生變得只剩下生存，一點意義也沒有。

主耶穌，祢是天主，卻甘願放下祢的一切尊榮，取了奴僕的形體，誕生在馬槽中。祢為了拯救我們，不息受盡各種痛苦委屈，且死在十字架上，犧牲成為祭品，更為了陪伴我們直到今世的終結，將祢的血肉分給我們作飲食。求祢派遣聖神來到我心中，時常提醒我，我需要的惟有祢，祢是所有幸福及快樂的泉源。求祢賜給我智慧，使我能不再受魔鬼方言的蒙蔽，不再為得到好吃好看且能增加智慧的果子而不息傷害別人，破壞與祢的關係，因為只有在為了別人的好處而甘願犧牲自己的這種愛中與祢結合，我的喜樂才會圓滿。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - clinic]

樂:   好喇，財哥，你坐喺呢度先，嗱，而家我幫你去攞籌等睇醫生先嗄。

財:   好呀唔該你呀，阿樂。

樂:   唔使客氣啦！嗱，不如咁啦，你拎住我條念珠，念住玫瑰經先，我好快返嚟㗎喇。

財:   好呀，好呀。

樂:   搞掂喇，財哥，攞咗籌喇，不過都幾多人，可能要等一陣先。

財:   哦，唔緊要啦，阿樂，我都好鍾意念玫瑰經㗎！因為我成日都坐唔定，念玫瑰經可以幫我好好咁靜低落嚟，集中精神祈禱呀！

樂:   係呀，財哥，念玫瑰經真係好啱我呢個祈禱新手呀，尤其是同一班人一齊念嘅時候，聽住其他人祈禱嘅聲音令我都覺得好有安全感，好快呢就可以投入到祈禱嘅氛圍嗰度喇。

財:   咦！呢條就係……哦……阿Grace送俾你嗰條玫瑰念珠呀？

樂:   (尷尬地) 係呀！因為方便隨時可以拎出嚟念，咁咪成日都袋住囉……

財:   哦……哈哈哈。咁呢條念珠，為你嚟講，又真係好有意思嘅……

樂:   係呀，財哥，我成日都覺得呢一條念珠，就好似聖母媽媽喺天上面拋落嚟嘅一條救生索咁樣，喺深淵嗰度我就靠住佢慢慢爬返出嚟，而且仲可以慢慢咁樣繼續爬去天主嘅身邊...

財:   感謝天主，感謝耶穌喺十字架上嘅時候將佢嘅媽媽送咗俾我哋呀……

樂:   Yes, 感謝主，讚美主！

財:   係呢，自從嗰次你俾阿Grace邀請，第一次去聖母軍聚會同埋服務之後，你就變咗熱心嘅教友嗱？

樂:   哈哈哈，其實都未係㗎，雖然嗰次嘅感覺係非常之咁好嘅，hm……都算係一個好重要嘅轉捩點嚟㗎！

財:   咦，咁聽起上嚟，似乎好似仲有啲大事會發生咁喎，嗱，你唔好再賣關子喇，好心急想聽埋你嘅愛情故事呀。

樂:   哈哈哈，其實係一個浪子回頭嘅故事就真……好啦！咁我繼續講埋佢喇，hm……嗰次去完聖母軍開會同埋服務之後呢，心靈其實都幾大衝擊㗎，除咗嗰次「祈禱初體驗」所帶來嘅平安之外呢，之後去探訪老人院，見到嗰啲義工都做到身水身汗，但係每個人塊面上面都掛住嗰個由心而發嘅笑容，而佢哋嘅投入同付出，令到嗰間冷冰冰，死氣沉沉嘅老人院，即刻變到好溫暖，好有生氣咁樣樣……我望住嗰啲笑到好開心嘅老人家呢，我心裡面，人生第一次，感受到一份前所未有嘅喜樂……

(回憶中，回到過去)

[電話對話]

Grace:   喂！阿樂？

樂:   咦，咩事呀，Grace？

Grace:   上次唔記得問你呀，因為我哋呢個星期六會去探兒童院。如果你有啲好新淨嘅玩具或者電子產品，可以星期六帶埋嚟送俾兒童院啲小朋友㗎。

樂:   好呀，我返去睇睇吓。

Grace:   另外呢……就係……

樂:   做咩呀？

Grace:   ……今次我哋探訪嘅係一間修會辦嘅兒童院，咁啱嗰日會有神父去嗰度開彌撒呀，我哋都會參加……我估你應該都好耐冇參與過彌撒㗎啦，但係我真係好想你都能夠得到參與彌撒所帶來嘅全部恩寵喎……

樂:   err……咁我要做啲咩㗎？

Grace:   hehe……唔係好難㗎咋！……

樂:   err……咁即係點樣啊？……

Grace:   你去搵神父辦修和聖事就得㗎喇。

樂:   咩話？辦咩事話？

Grace:   OK OK! 嗱咁喇，星期五，我就約你食lunch。俾啲資料你同埋解釋俾你聽點做啦。

樂:   ……err……OK OK……

Grace:   咁我幫你約神父囉喎，星期六上晝我哋開會之前去辦告解啦。

樂:   err……

Grace:   唔同你講住先喇，星期五見！拜拜！

樂:   err……bye

[場景 - 阿樂辦公室]

Peter:   樂哥，我哋幾個今日諗住去試吓隔離街新開張嗰間餐廳，你一唔一齊呀？

樂:   Sure! Why not? 5分鐘後，lift口等。

Peter:   OK!

[場景 - 餐廳] 

Rachel:   (揮手) 唔該俾幾杯水！

Mandy:   嘩Rachel，你隻Cartier戒指好閃喎！

Albert:   嘩Rachel！好富貴喎。

Rachel:   嘩Albert，我隻介指仔又點夠你隻撈富貴喎。

Albert:   嘩Rachel！你鋪話法吖！男人出嚟行，點都要有翻啲碼頭㗎嘛！嗱，呢呢呢...你睇吓連阿Peter仔呀都掛住八兩金喺條頸度啦。

Peter:   嘩嘩嘩，你哋兩個做咩燒埋我嗰疊呀？你哋睇清楚啲啦，樂哥先至喺主角呀！

Albert:   係喎，Peter仔，今次你又唔係齋刷喎。各位觀眾，大家睇吓樂哥一身型格嘅打扮...

Rachel:   係喎Albert，佢真係由頭到腳，件件都係名牌嚟㗎...

Peter:   點止呀Rachel，仲要樂哥有品味，同carry得好先至有咁型咋。

Mandy:   大家漏咗一個好重要嘅亮點喇！一個成功嘅男士，又點少得一部最新款嘅電話呢？

Albert:   係喎Mandy！你呀真係眼利喇，咁都俾你睇到。呢一部係最新嘅model仲未公開發售㗎，樂哥你咁都買到，好勁啊！

樂:   你哋俾啲心機做嘢，公司業績好，年尾攞住份bonus你哋想買乜就買乜啦！

Albert:   我要換個部新手機。

Mandy:   Albert，你好似上個月先至換咗部新手機咋喎。

Albert:   你啲女人識咩吖？

[場景 - 阿樂公司電梯大堂]

樂:   Grace！快啲行啦，我哋今日去遠啲食晏。

Grace:   點解呀？

樂:   行遠啲碼頭嗰邊有間社企餐廳，你會食得開心啲呀嘛。

Grace:   哈哈哈！係呀，有時我都會去嗰度㗎。

[場景 - 社企餐廳]

Grace:   阿樂，呢度嘅檸檬批好出名㗎，你要唔要試吓？

樂:   嘩，你食哂成個餐，仲食得落甜品呀？你嘅大食果然唔係浪得虛名吓。

Grace:   哈哈哈。咩啊？個餐好少嘢食咋嘛！…… Anyway，言歸正傳，頭先講咗咁多關於辦告解嘅嘢你明唔明呀？有冇問題問呀？

樂:   hm……我諗我暫時OK嘅。

Grace:   好呀！咁，你今晚返到屋企準備一吓，聽朝早啲去到聖堂，喺聖體面前祈禱等神父嚟喇。

樂:   {拿出禮物遞給Grace} ……err……阿Grace，呢個我買嚟送俾你，我想多謝你，真心為我好，帶我返番church。

Grace:   嘩，阿樂，條手鍊好靚呀，亦都好有心思呀，嗯……但係我真係用唔著呀，你不如留番嚟送俾真心識得欣賞佢嘅人啦。

樂:   你唔鍾意條手鏈呀？

Grace:   hm……應該咁講，佢係好靚好貴重，我都睇得出你花咗好多心思去挑選啲charms，我好欣賞你嗰份心意呀，我已經收到喇，為我嚟講已經係好好嘅一份禮物嚟㗎喇。但係呢個世界上，實在有太多好靚嘅野，我唔可能全部都擁有㗎，好似好靚嘅花咁，我好鍾意好欣賞佢㗎，我見到啲花會好開心㗎，但係佢唔係我日常生活中嘅必需品，我都唔需要佢，所以我冇必要要擁有佢囉……

樂:   原來你唔鍾意飾物嘅，早知，我買啲實用啲嘅嘢啦。

Grace:   哈哈哈，真係唔使喇，我一無所缺啊，其實人生活真正需要嘅嘢唔係咁多㗎咋，就好似我得一對腳，真係著唔到咁多對鞋囉。況且，你真係唔使咁客氣多謝我喎，能夠帶返啲迷失嘅羊仔返返去耶穌個羊棧，係人人有責㗎！俾著第二個都會咁做啦！

樂:   哈哈，我都係人生第一次，有人當我係羊仔。

Grace:   哈哈哈，唔係當你係羊仔，係所有人都係耶穌嘅羊仔。

樂:   咩~咩~

Grace:   哈哈哈

今日反思

1. 你曾否試過參與任何義工服務？為什麼呢？有何得著？
2. 你曾否試過追求擁有最新型號的手機或任何其他電子產品嗎？為什麼呢？是真的有這個需要嗎？
3. 你有試過經常想要購買最新款的時裝嗎？你有試過看見別人穿著最新款，現在最流行的衣服飾物，你都想要嗎？你真的有這個需要嗎？
4. 你有否點算過在你家中你擁有幾多雙鞋？幾多件衣服？
5. 你曾否發現一些在你的衣櫃中已好些時日，但你從來都沒有穿過的衣物呢？你在購買的時候有沒有曾經想過你是否真的需要它們呢？
6. 你曾否試過因得到你渴望購買的東西而感到很滿足，很快樂呢？那種滿足及快樂持久嗎？

每日聖言

「你們不可與此世同化，反而應以更新的心思變化自己，為使你們能辨別甚麼是天主的旨意，甚麼是善事，甚麼是悅樂天主的事，甚麼是成全的事。」(羅12:2)

每日禱告

慈愛的天父，感謝祢讓我明白到快樂並不在於擁有任何受造物，而是在於擁有祢及被祢所完全擁有。感謝祢賜我日常所需的一切，我實在是一無所缺。但是軟弱的我，卻仍然經常跌倒，經常渴望擁有各種各樣的東西，而且不知不覺間被這些欲望捆綁了也不自知。求祢派遣聖神來到我心中，時常提醒我，我心底裡實在需要的就只有祢，世間上所有的東西，沒有一樣能夠真正滿足我，求祢使我不至於花光所有時間不斷的追尋世物，而耗盡我所有的精力，及受盡不滿足及失落的痛苦。聖神呀！求祢賜我智慧和明達之恩，使我能識破魔鬼的謊言，並求祢賜我勇氣，抵抗生活中種種誘惑，堅持渡簡樸的生活，將精神時間花在追求天國的義德，及和祢建立親密的關係之上。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - 財家]

財:   啊，估唔到阿Grace年紀輕輕思想咁成熟，咁識得諗呀！

樂:   係呀，財哥，我從來都未遇過一個女仔，好似佢咁，唔單止唔追求物質嘅享受，而且對生活有咁深入嘅反思。

財:   呀！我記得好幾年前呢阿Grace嗰陣時仲讀緊書，已經開始好活躍，輔祭呀，讀經呀，聖母軍呀……喺聖堂成日都見到佢㗎。

樂:   哦，財哥原來你都識阿Grace㗎？

財:   咁又唔係好熟嘅，只係對呢個成日喺聖堂出現，活潑又好喜樂嘅細路女好有印象咁啦。

樂:   係啊，佢嗰份喜樂真係好特別㗎……好有吸引力同感染力。有佢出現嘅地方呢，都好似特別充滿咗快樂咁樣。同佢一齊，真係連個人都會開心啲㗎。

財:   (鬼馬地) 咦咦咦？阿樂，你食完一餐飯就得咗嗱？

樂:   (尷尬地笑) 誒，財哥，唔係呀！唔係呀！

財:   好啦，你繼續講埋你個故仔啦。

樂:   好好好……自從同阿Grace去完Mercy HK Canteen食飯之後呢，佢講嗰啲嘢，尤其係佢對快樂嘅睇法，唔知點解，耐唔耐就會浮返出嚟，後來諗返轉頭我先至知道，原來當時佢講嘅嘢正正好應咁拮中咗我，就好似有把刀深深咁插入咗我個靈魂嗰度。講真吖，幾貴幾精緻嘅食物我都食過，我都食得起，但係，正如佢所講，嗰啲食物食落口嘅時候係好正，有種快感喺度，填飽咗我個肚，但係我個心，硬係覺得好空虛好唔實在咁樣，依然覺得人生好似冇乜意義……

[電話對話]

樂媽:   阿樂呀，媽咪啊，阿妹話佢搵到一間泰國菜，今日突然做半價優惠，佢就即刻Book咗枱，我哋不如下次先至去你鍾意嗰間意大利餐廳啦……

樂:   (按耐著心裡的憤怒) 唉！ 阿媽，連慶祝我生日呢，都唔可以去食我鍾意嘅餐廳嘅話呢，我諗慶祝嚟都冇乜意思啦，不如你哋自己去啦，好唔好呀？！。

樂媽:   誒……好好好，咁我話俾阿妹聽照舊去嗰間意大利餐廳。

樂:   (晦氣地) 好！好！拜拜！。

樂媽:   唉...咪住！仲有仲有呀！阿妹話呢因為要開OT，所以想改晏啲，晏啲先嚟9點半先食呀。

樂:   (強忍怒火，晦氣地) 間餐廳9點半last order 㗎喇，我哋9點半先去呢人哋唔俾我哋入去㗎喇。

樂媽:   哦，咁呀？……我哋早啲到囉，阿妹差唔多到就嗌嘢，等佢嚟到我哋一齊食啊。

樂:   (強忍怒火，晦氣地) Fine! 拜拜！拜拜！

[場景 - 意大利餐廳]

樂妹:   (上氣不接下氣的) 唔好意思呀，遲咗少少！爹哋！媽咪！

樂媽:   阿妹呀，你做乜咁遲？成十點鐘喇。

樂妹:   Sorry sorry。我一放工就飛的過嚟㗎喇。

樂爸:   好喇，快啲食喇。我哋已經拖到最遲截單前先至落單㗎啦。呢一度呀上菜上得好快㗎。

樂妹:   唔緊要啦爸爸，啲餸仲好暖。

樂媽:   阿妹啊，你食咗嗰啲熱嘢先啦，沙律陣間先食啦。

樂妹:   hehehe! ……OKOK 媽咪！

樂爸:   阿妹，你做乜嘢咁夜先至放工啊？

樂媽:   係囉！呢排好似越整越夜咁嘅？

樂妹:   我都唔想㗎。有個同事走咗，仲未請到人呀。其實都唔知佢係咪真係仲請人嘅，我要做埋佢嗰份呀，所以咪搞到成日都要OT囉……

樂媽:   哎呀！你因住餓壞個胃呀，你如果知道要OT呢，就早啲食咗飯先，就唔好等到放工先至食呀嘛。

樂妹:   知喇，媽咪。

侍應:   請問你哋仲會唔會需要啲甜品咁呢？我哋廚房要close。

樂媽:   一份開心果雪糕吖唔該。

樂爸:   我同你媽咪一齊要一份就得㗎喇。

樂妹:   我要Tiramisu！

樂:   我都要一份啊。

侍應:   呀！唔好意思呀，我哋剩翻一份。

樂:   我話我要一份Tiramisu

樂媽:   阿妹呀，今日我哋慶祝阿哥生日。你讓俾阿哥食啦。

樂妹:   我哋嗌一份share咪得囉。

樂:   (深沉而堅定，慢慢地說) Sorry 我講多次，我要一份 Tiramisu

樂媽:   err……咁啦…要多一份開心果雪糕啦，阿妹，我知你都鍾意食嘅，係咁多喇，唔該！

侍應:   一份Tiramisu，兩份開心果雪糕，多謝哂！

[電話對話]

Grace:   喂，阿樂？

樂:   係呀！Grace！你聽日得唔得閒一齊食lunch？

Grace:   ……hm……得嘅……不過咁，你聽朝10點鐘先嚟堂區活動室，同我哋一齊參加聖母軍開會吖，然之後我哋一齊去食lunch，好唔好啊？

樂:   errr……

Grace:   唔好err喇，就咁決定啦！我哋聽日見！

樂:   er……堂區……活動室喺邊㗎？

[場景 - 聖堂 / 堂區活動室]

樂:   唔該，我想問吓堂區活動室喺邊度㗎？

Receptionist:   你係咪聖母軍開會呀？

樂:   ……er……係呀，係呀！

Receptionist:   你喺呢度行落一層，直去到尾就係㗎喇！

樂:   OK，唔該！

Grace:   早晨，阿樂，好準時喎！仲早到咗添喎！

樂:   (少許失落) 誒……係啊，今朝好早醒咗……

Grace:   琴晚瞓得唔好呀？

樂:   係啦，琴晚瞓得麻麻哋...

Grace:   你有心事唔開心？

樂:   er……kind of……

Grace:   唔緊要，陣間我哋一齊為你祈禱吖。

樂:   吓？唔使喇啩？

Grace:   哈哈哈，驚得你個樣。哈哈哈。

樂:   其實陣間係做啲咩㗎？我完全冇概念啊。

Grace:   好簡單㗎咋，首先呢，我哋就會一齊念玫瑰經，跟著就會讀聖經啦，然後，我哋會講會務，咁你可以聽下了解吓我哋究竟做緊啲咩，然之後呢，仲有神師嘅訓話呀咁囉，嗯……大概個半鐘左右啦。

樂:   哦！咁，我唔使講嘢㗎系嘛？！

Grace:   哈哈哈，唔使，我已經同團長講咗㗎喇，陣間我會介紹你係有興趣入會嘅，嚟參觀嘅。

樂:   嘩！乜有啲咁嘅事咩，我無啦啦俾人踢咗入會都唔知嘅？

Grace:   哈哈哈，咩啊？你有話好㗎！

樂:   騙徒嘅手法真係層出不窮……

Grace:   呀，係啊！一陣食完lunch你有時間同我哋一齊去做服務㗎嗬？

樂:   嗯……原來女人都真係幾恐怖……

Grace:   (偷笑，靜俏俏地) shhh!!! 開始喇。

神父:   因父、及子、及聖神之名，亞孟......

[場景 - 聖堂 - 活動室外]

樂:   Grace，嗱，還返俾你，唔該哂你頭先借條玫瑰念珠俾我。

Grace:   唔洗還喇，阿樂，你袋住啦，每日都拎出嚟唸吓，下次開會都要用㗎！我估你都應該冇玫瑰念珠㗎喇！

樂:   err 咁……Thank you!

Grace:   Yeah! 我當你應承咗會繼續嚟開會㗎喇！感謝天主。

樂:   (搖頭歎息) 其實頭先開會之前，我都已經知道我上咗賊船㗎喇。

Grace:   哈哈哈。認真問啊，阿樂，你覺得同我哋一齊開會點呀？

樂:   開會點呀？我咁大個仔呢都係第一次參加呢啲宗教團體㗎咋，雖然小學嘅時候已經領咗洗，但係畢咗業之後，就再冇返過去聖堂喇，印象中，好似祈禱都冇。

Grace:   咁你嘅人生第一次覺得點呀？

樂:   同你哋一齊念經嘅時候，有一種好特別嘅感覺，好似……好難形容，總之覺得……個心……好舒服，嗰種感覺係……係從來都冇試過嘅……

Grace:   係呀，尤其是念玫瑰經呀，你唔使等到返到嚟開會先至同我哋一齊念㗎。嗱，你袋住條念珠啦，等可以隨時隨地搭緊車又好，臨瞓前又好，總之咩時候都可以拎出嚟念㗎。特別你係好需要一份支持，一份寧靜，一份安慰嘅時候…… (陷入深思) 當一邊念一邊默想耶穌嘅一生，就將自己浸喺耶穌對你嘅愛當中，然之後個人就好似慢慢叉翻電咁㗎喇……

樂:   OK，係喇，你哋都好似做好多唔同嘅服務咁。

Grace:   係呀！頭先開會你都聽到㗎啦，我哋下晝會去探區內嘅老人院。我哋收集咗一啲禮物準備送俾佢哋，去到同佢哋傾吓偈，唱吓歌，我相信你一定冇問題嘅。

樂:   Ha? err ……!

今日反思

1. 你曾否試過很喜歡跟別人競爭？看見別人擁有或想要某些事物，你也突然變得對那事物很感興趣，很想得到呢？你真的是那麼喜歡，或者真的那麼想要它嗎？
2. 當你成功爭取得到之後，你的感受又是怎樣的呢？感到快樂嗎？那快樂持續了多久？
3. 你曾否試過發現你幾經辛苦爭取得來的東西，其實一點也不如你想像的好，你也其實並不是那麼想要，甚至乎有點後悔你曾經為爭取它而犧牲了很多東西？
4. 你有曾經想過那個敗給了你，卻是真心想要那個東西的那個人的感受嗎？
5. 你認為要得到或者擁有什麼才會快樂？真的是要得到才會快樂嗎？
6. 你曾經試過在祈禱中經驗到天主嗎？那個感受是怎樣的？

每日聖言

「隨從肉性的切望，導入死亡；隨聖神的切望，導入生命與平安。」(羅8:6)

每日禱告

慈愛的天父，感謝祢讓我明白到即使我能夠擁有全世界，如果為此而喪失了我的靈魂，為我實在毫無益處。因為對世物的追求，不論是物質還是非物質的名譽，地位，尊重，權力，等等，我都只會因此而離開祢越來越遠，而不知不覺間生活在地獄中，受盡慾望永遠不能滿足的痛苦。

求祢派遣聖神來到我心中，提醒我世上所有受造物，不論人、事、物，都不能滿足我心靈最深處的渴望。求祢賜給我智慧明辨那些是魔鬼的誘惑，使我不至於墮入追求各種對世物的慾望的陷阱中。聖神呀！求祢光臨到我心中，教導我，陪同我一同祈禱，讓我能在祈禱中感受到天主的愛，耶穌賜給我的平安，並且透過在祈禱中與祂相遇，能與祂日益建立互信的關係。

以上所求是因祢的聖子，我們的主耶穌基督的名。亞孟。

願光榮歸於父及子及聖神，起初如何，今日亦然，直到永遠。亞孟。

[場景 - 財家]

財:   哦，原來你想追我哋阿Grace啊！

樂:   (尷尬地) 哎呀！財哥，你唔好話俾人知呀，費事見到面尷尬啦。

財:   你真係有眼光呀，阿樂呀，阿Grace係個好女仔嚟㗎，喺堂區好活躍，又虔誠又可愛。

樂:   (尷尬地) 哈哈哈……都係㗎，好似我咁講啊，我第一次喺公司週年晚會嗰度見到阿Grace嘅時候，就係俾佢一種好特別嘅氣質吸引，到後來我先知道，嗰種係佢發自內心嘅喜樂，係我心底裡面一直好想得到嘅嘢。

財:   話時話咧，其實我喺你身上都感受到呢一份喜樂喎。

樂:   哈哈！感謝天主，安排我透過認識阿Grace然後慢慢改變咗我。當時嘅我真係覺得好迷惘㗎，身邊嘅人都羨慕我擁有好多嘢，以為我好幸福，但係我真係一啲都唔覺得好開心，甚至開始「懷疑人生」。

財:   嘩！愛情嘅魔力真係利害。可以令一個人有咁大嘅改變。

樂:   (尷尬地) 哎呀！哈哈，財哥，其實唔係好似你想像中咁樣㗎……

財:   好喇好喇，我放過你，都係唔好再暫亂你嘅歌柄，等你繼續講埋你嘅故事先……

樂:   哈哈，好呀，好呀……上回講到……

財:   ……你公司嘅週年晚會呀嘛

樂:   上回講到咧……係……咁喺週年晚會上我見到阿Grace之後咧，唔知點解，經常都會諗起佢，於是……

(回憶中，回到過去)

[電話對話]

Grace:   喂！

樂:   Hi, Grace! Marketing 阿樂呀。

Grace:   哦，我知喇，問我係咪full of grace嗰個阿樂呀嘛。

樂:   冇錯呀，就係之後俾你用一連串問題連環轟炸嗰個阿樂呀。

Grace:   哈哈，但係你好似仲未答我啲問題噃……

樂:   係呀，所以咧我係打嚟自首嘅。你呢個星期五放工之後得唔得閒食個飯？

Grace:  呢個星期五？(check calendar)……都可以唔使OT嘅。好啦。

樂:   咁到時樓下lobby等啦。

Grace:   OK，到時見，拜拜。

樂:   Bye, see you!

[場景 - 樂辦公室]

Peter:   樂哥，你行得未呀定係我哋去攞定位先呀？老頂請食飯，我哋諗住早啲出門口穩陣啲。

樂:   嗯，sure sure……Peter你Call哂大家5分鐘之後get ready，我地全team一齊行。

Peter:   收到，樂哥。

[場景 - 酒店餐廳]

Rachel:   嘩，我咁大個女都係第一次嚟六星級酒店食飯㗎咋！

樂:   Rachel，繼續俾啲心機喺度做，只要meet到target，公司出啲bonus唔錯㗎，it’s not a small bonus.

Albert:   樂哥，Rachel 佢都未做夠一年，梗係懵吓懵吓㗎啦……

Peter:   咁又係喎，Albert，自從樂哥入咗嚟做之後，公司嘅業績連年爆數，唔單止啲bonus和味，我哋已經去過好多trip啦，嗱，曼谷，北海道，悉尼，芝加哥都去過呀。

樂:   Peter，唔使講呢啲，呢啲係成間公司上上下下一齊努力合作嘅成果嚟嘅。

Mandy:   係啊，我而家年年都好期待呢個公司旅行，公司咧都真係冇待薄我哋㗎，無論食啦，住啦，玩啦，都好有質，次次都大開眼界，又夢寐以求。真係一次過滿足哂我所有嘅願望呀。……我到而家都仲好掛住前年嗰隻長腳蟹同埋我媽家姐呀(omakase)……

Albert:   係啊Mandy，真係我自己去玩都未必會咁豪呀……好似舊年去澳洲咁，任食Caviar魚子醬做早餐，我都即刻搣吓自己，睇吓我係咪未瞓醒……定係上咗天堂呀？

Peter:   Albert你講起澳洲，我記得我哋嗰條team都冇人夠膽㗎，係得阿樂哥一個夠膽玩skydive。

Albert:   點止呀，Peter，樂哥玩哂所有我哋唔夠膽玩嘅嘢呀……咩潛水呀，激流，bungee jump(笨豬跳) ……，呢呢呢，尤其係你呀……連熱氣球都唔敢同我哋坐呀。

眾人:   哈哈哈！

Mandy:   哎呀……唔好再講喇，嗰啲回憶返哂嚟喇。好掛住個啲鮮甜又帶有清新海洋味嘅生蠔，同埋香港點都食唔到口感咁幼滑，又奶味咁濃郁嘅雪糕呀……

Rachel:   嘩！唔知今年去邊呢？我真係好期待呀！

樂:   唔使羨慕到流哂口水嘅Rachel。只要大家俾心機，個市又好，你想食乜，去邊度玩都得啦。

眾人:   爆數！爆數！爆數！

(Shhhhhhhhhhhhhhhhhhh)

眾人:   (尷尬地，輕聲地) Sorry! Sorry!

[場景 - 樂公司電梯大堂]

Grace:   Sorry! Sorry! 阿樂，我遲咗少少呀！

樂:   我都係啱啱到啫。係呢，想食啲咩呀？

Grace:   我乜都冇所謂，食乜都得。

樂:   OK，咁就不如近近哋去附近嗰間法國餐廳啦，都米芝蓮兩星㗎……

Grace:   ……errr……不如我帶你去試菜吖……啱啱新開張冇耐，我一直都好想試……要過海介唔介意呀？

樂:   好呀！我無問題呀！

[場景 - MercyHK Canteen]

Grace:   到喇！呢度就係廟街胡神父嘅慈悲香港食堂喇。

樂:   (傻了眼) 哦！係啊！

Grace:   嘩！估唔到裝修咗之後靚咗咁多喔……

樂:   (周圍看，有點唔自然) 嗯，ah ha……ah ha

Grace:   好嘢，有位喇，坐啦。你睇吓想食啲乜嘢？

樂:   err……，好呀。

Grace:   嘩！有好多唔同款式嘅點心呀。

樂:   (強作鎮定，保持風度) …… er……都係啊！

Grace:   你睇吓呢個松露冬菇包，幾得意！嘩，仲有呢個，黑金流沙包都好吸引喎！

樂:   嘩！乜你淨係鍾意食包㗎咋？

Grace:   哈哈哈，梗係唔係啦。呢度有咁多款點心，有三色燒賣啦，素翅灌湯餃啦，蝦米腸啦，牛仔骨，叉燒酥……我樣樣都想試啊。

樂:   嘩，你食唔食得哂㗎？

Grace:   哈哈，我好大食㗎。

樂:   咁你使唔使叫埋甜品添呀，我見到後面嗰版仲有甜品喎

Grace:   係喎係喎，仲有我最愛嘅長洲糯米糍，同埋雷沙煎堆添。

樂:   唔知呢個慈悲特飲係啲乜嘢嚟嘅呢？

Grace:   係呀，我都想試呢個呀。

[場景 - 回家路上]

Grace:    嘩好飽啊！真係好滿足啊！

樂:   我見你真係食得好享受，好開心咁樣樣喎。

Grace:   咁你呢？你食得開唔開心呀？

樂:   幾好呀！啲嘢食都好好味呀。不過都係唔夠睇住你食到好似個小朋友咁開心咁有娛樂性！

Grace:   哈哈！係呀，其實快樂真係用錢都買唔到㗎。

樂:   係呀，我呢啲無價寶嚟㗎。

Grace:   哈哈哈。我哋每個人都喺天主眼中嘅無價寶嚟㗎！

樂:   呀，係呢，點解你會帶我嚟呢間餐廳度食飯嘅？

Grace:   其實，對我嚟講食物都係要嚟果腹，同埋提供身體所需嘅營養。所有嘅食物都係天主嘅恩賜嚟㗎。食到美味嘅食物，固然係會感恩啦。但係與其食1000蚊一塊牛扒。我喺呢度食30蚊一碟嘅牛仔骨，但又可以幫到有需要嘅人喎，咁唔係更好咩？

樂:   嗯……I guess

Grace:   哈哈哈，雖然我承認㗎，如果我要俾1000蚊食塊牛扒，我應該會一邊食一邊覺得好肉痛，所以可能因為咁樣會影響咗個味覺……哈哈 

樂:   哦！原來係咁。你早啲出聲呀嘛，我請你食，你咪唔使食得咁辛苦囉。

Grace:   哈哈哈，但係，其實任何食物無論有幾好味都好，留喺個口，都只不過係一陣間，就吞咗落個肚度喇，係啊，佢係好好味㗎，咁又點呢？係嘅，食嘅時候可能都覺得開心嘅，但嗰種開心其實係好短暫㗎。

樂:   哈！咁咪再食過囉！

Grace:   哈哈哈！我都仲未落格又食？點食得落啊！

樂:   (打趣道) 哈哈！No, no, no, 24/7 Non-stop eating!! 

Grace:   哈哈哈！係呀。同埋有時呢一種嘅開心完咗之後，唔知點解係會有一種失落嘅感覺！

樂:   Well! 情緒有高有低，好正常啫。都唔可以成日好high high咁嘅狀態㗎。

Grace:   我意思係好似頭先我哋去Mercy HK Canteen食飯，嗰種嘅快樂係好唔同㗎……

樂:   你都有覺得嗰啲食物好好味㗎。有啲咩唔同啫其實？

Grace:   我嘅開心唔單止淨係因為啲食物好好味，我嘅開心亦都包括好欣慰胡神父呢個咁有意義嘅服務可以成功推行，唔單止可以俾啲更新人士有工作嘅機會，可以讓佢哋真正重投社會，胡神父更希望 canteen可以做到提供免費飯餐俾啲無家者。淨係咁樣諗我已經覺得好感動，個心真係好火熱啊。

樂:   嘩！乜你開心都開心得咁複雜嘅？啲女人真係好難理解！

Grace:   仲有啊，我唔單止會為胡神父呢個服務祈禱，亦都會介紹其他人去幫襯佢，更加希望社會上有更加多嘅人可以效法胡神父嘅榜樣，俾更加多嘅更新人士一個工作嘅機會添。

樂:   哦！OK，好啦，咦？你有車喇喎，你喺車上面繼續開心啦。不過唔好開心到唔記得落車喎。

Grace:   哈哈哈！你放心啦，我總站落車㗎。

樂:   Great! Have a nice weekend!

Grace:   Bye~

樂:   Bye~

今日反思

1. 你有否曾經試過對於食物的味道，來源，烹調方法……等等，過於追求，或過份執著呢？這份執著或者欲望有為你帶來內心的不自由嗎？
2. 你有否試過沉迷進食某一種食物或飲品，而沒有節制地進食呢？有沒有因此而影響健康呢？
3. 當你吃到美味的食物的時候，你有想起天主，並因此而感謝讚美祂嗎？
4. 你有否在選擇餐廳的時候會優先考慮光顧社企營運的餐廳？如果他們的食物不是特別好吃,服務未能做到特別好，坐位也並不特別舒適，你仍然願意支持他們嗎？為什麼呢？
5. 你有曾經試過沉迷其他形式的享受嗎？那是什麼呢？你在其中經驗到真正的快樂嗎？
6. 你有曾經跟其他人分享基督徒對喜樂和快樂的看法嗎？

每日聖言

「沒有一個家僕能事奉兩個主人: 他或是要恨這一個而愛那一個，或是要依附這一個而輕忽那一個；你們不能事奉天主而又事奉錢財。」(路16:13)

每日禱告

慈愛的天父，感謝祢讓我明白到一切美善，都源自於祢，都是好的，都是祢的恩賜。求祢派遣聖神來到我心中，常常提醒我，每當遇上一切美好的事物，我都要感謝，但不要讓這些美好的事物成為我所追尋的目標，因而使我的目光離開祢，然後迷失方向。主耶穌，感謝祢屈尊就卑降生在馬槽中，而且更成為了我們在這塵世旅途上靈魂真實的食糧。求祢增加我的信德，因為祢說過，我不必憂慮吃什麼或穿什麼，我所...