Dütmal geiht dat bi "Wi snackt Platt" - mank anner Saken - üm en ne’et Comic-Heft op Platt: Norddüütsche Künstlerinnen un Künstlers vun dat Künstlerkollektiv "Pure Fruit" ut Kiel hebbt ut de Gedichtsammeln “Quickborn” vun den Schrieversmann Klaus Groth en Comic tekent. Ok Brösel, de Tekner vun de Comicfigur "Werner", is mit dorbi. Denn hebbt wi ok noch twee Geschichten för Jo: Matthias Stührwoldt vertellt wat ut sien ne’et Book “De gröne Dumen för Unkruut”, dat in'n Quickborn-Verlag rutkamen is, un wi höört de ganz wunnerbare Geschicht “Gott un de Brägenplietschmaschien”. Mit düssen Text hett Marie-Sophie Koop ut Hamborg, annerletzt an uns NDR-Poetry-Slam op Platt deelnahmen un is dormit ünner de Winners ween. Togoderletzt wies wi hen op en Kunzert, dat de Ledermaker Willie Stemwede ut Hamborg-Rahlstedt an'n Sünnavend, den 23. November, nameddags Klock in't Kulturzentrum "Allegro" in'n Güstrower Weg 2 in Rahlstedt geven deit. Korten för 10 Euro gifft dat bi'n Bookhannel Heymann in Rahlstedt un an de Avendkass.

Moderatschoon: Jan Wulf

De Leder in düsse Podcast-Utgaav vun "Wi snackt Platt":

Dat olle Klavier - Gerrit Hoss
Fresenhoff - Santiano
Disse Nacht - Iko Andrae
Wind un Meer - Willie Stemwede
Mien Jung vun't Dörp - Wiebke Colmorgen und Hardy Kayser

Bi "Wi snackt Platt" stellt wi Jo dütmal dat ne'e Stück "Alarm in't Theaterhuus - Carmen darf nicht platzen" in't Ohnsorg-Theater vör. Dorto sünd wi ok noch op de Plattdüütsche Bökermess ünnerwegens, de dat düt Wekenenn (9. un 10.11.2024) in'n Lichtwarksaal vun'e Carl-Toepfer-Stiften in Hamborg to beleven gifft. Un wi kiekt bi de Volksspeelbühn Rissen vörbi: De fiert an'n Sünnavend, den 16. November Premieer mit en Stück vun de Erfolgsautorin Dora Heldt Premieer. De Kumedie "Bi Hitt is da tominnst nich koolt" kann en is an'n 16., 17., 22., 23. un 24. November ankieken. Mehr Informatschonen un ok de Korten gifft dat hier.

Moderatschoon: Jan Wulf

Bi "Wi snackt Platt" fiert wi dütmal dat 15-johrig Jubiläum vun de Tüdelband. An’n 7. November hett de Band ut Hamborg en grotet Jubiläumskunzert in’n Musicclub Knust op St. Pauli. Wi kiekt en beten wat torüch op de 15 Johr, de dat de Band nu geven deit - un wi snackt mit de twee Muskanten vun de Tüdelband: dat sünd Mire Buthmann und Malte Müller.

Utblick op de Plattdüütsche Bökermess

Dorto gifft dat ok noch en Utblick op de Plattdüütsche Bökermess tokamen Wekenenn hier bi uns in Hamborg: Wi snackt mit den Experten för plattdüütsche Literatur Heiko Block vun't Institut för Nederdüütche Spraak (INS).

Un denn maakt Klappmuulpopp Werner Momsen un Henning Kothe ok noch en beten wat Lust op jümehrn Optritt in’e Komödie Winterhuder Fährhaus an’n tokamen Sünndag.

Moderatschoon: Jan Wulf

Se is de Grand Dame vun't Ohnsorg-Theater un düt Johr harr se ehrn 80. Gebortsdag: Heidi Mahler. Iin düsse Utgaav vun "Wi snackt Platt" snackt wi mit de Schauspelersch över de Gala-Martinée, de dat Ohnsorg verleden Sünndag för se utricht hett.

De Grote Plattdüütsch Gala in'e Laeiszhall

Denn geiht dat ok noch üm de grote Plattdüütsch-Gala an'n Freedagavend in'e Hamborger Laeiszhall. Mit dorbi weern ganz vele plattdüütsche Künstlerinnen un Künstlers un Musikgruppen as "De Tüdelband", Sandra Keck, De Deichgranaten, Gerd Spiekermann, Matthias Stührwoldt, dat Ohnsorg Theater und vele, vele mehr. Modereert worrn is de Avend vun Klappmuulpopp Werner Momsen un Yared Dibaba - un präsenteert hett dat Ganze NDR 90,3.

30 Johr Tanks Theater

Se staht för plattdüütsche Kumedien un ganz veel Hartbloot: De Lüüd vun Tanks Theater. 30 Johr is dat nu her, dat Norbert Tank dat Theater mit ganz veel Liedenschop grünnt hett. He sülvst is twoors al vör acht Johr storven, man dat Tanks Theater, dat gifft dat jümmer noch. Jümmer wedder bringt dat Theater ne'e Stücken un Ideen op de Bühn un nu, nu warrt Jubiläum fiert mit en bunten Avend ünner den Titel "Dörtig dulle Johr". Benita Brunnert weer bi de Premieer dorbi un vertellt bi "Wi snackt Platt" mehr över den Avend.

Korten to winnen: Ohnsorg-"Live" in't NDR Fernsehn

An'n tokamen Sünnabendavend, den 26. Oktober, dor heet dat vunaf Klock viddel na acht mal wedder: rop op't Sofa, Fernseher an un Ohnsorg kieken! Dat NDR Fernsehn överdriggt mal wedder live un in Farv, wenn in't Ohnsorg-Theater de rode Vörhang opgeiht - un to sehn gifft dat en Krimi-Kumedie, de sik de Erfolgs-Schrieversmann Henrik Berg utdacht hett. "Landünner - Eine Nacht am Ende der Welt" heet dat Stück un spelen deit dat op en lütte Hallig - un dor geiht dat lustig, man ok spannend un ok so en beten wat spökenkiekerisch to. Bi "Wi snackt Platt" maakt wi Jo en beten wat Lust op dat Stück.

Moderatschoon: Jan Wulf

Dütmal fiert wi mit den Oostfreesenvereen Hamborg vun 1899 e.V. Jubiläum, wi sünd op den Stückgootfrachter MS Bleichen to Besöök un wiel an’n Dunnersdag ja nich blots Reformatschonsdag, sünnern ok Halloween is, geiht dat vundaag ok noch üm dat Thema Körbissen. Wi hebbt den Körbis Buern Manfred Brumund drapen. Togoderletzt wiest wi ok noch hen op de ne'e Utgaav vun "De Noorden op Platt", de dat nu ok online to sehn gifft.

Mehr Infos to de Sennen ünner: https://www.ndr.de/903/epg/Wi-snackt-platt,sendung1486680.html

Moderatschoon: Jan Wulf

In düsse Speziaal-Utgaav vun uns "Wi snackt Platt"-Podcast snackt wi mit de Grand Dame vun't Ohnsorg-Theater Heidi Mahler: över de Martinée to ehrn 80. Geboortsdag, de dat Ohnsorg verleden Sünndag för de Schauspelersch utricht hett, över de slaaplosen Nachten, de se in Saken Ohnsorg harr, as dat dor Striet geev, över de betere Stimmung nu, över de plattdüütsche Spraak un ehr Tokumst, över ehr Gedanken an en Afscheed vun'e Bühn, över den Spaaß, den se hett, wenn se dat Stück "Tratsch op de Trepp" spelen deit, över de Kraft, de se dordörch kriggt, dat se jümmers noch op'e Bühn steiht - un bannig veel mehr.

Moderatschoon: Jan Wulf

Bi "Wi snackt Platt" stellt wi Jo dütmal dat ne’e Album "Tweespraak bi Nacht" vun den oostfreeschen Ledermaker Jan Cornelius vör, dat geiht üm de ne'e Redakschoon vun dat plattdüütsche Wöörbook „De ne’e Sass“ un dorto maakt wi ok noch Lust op uns plattdüütsch Hörspeel "Ick kenn di nich" an Middewekenabend, op en Mitsing-Kunzert mit Jochen Wiegandt in'n Lichtwarksaal vun’e Carl-Toepfer-Stiften un op de grote Plattdüütsch-Gala mit Yared Dibaba, Werner Momsen un vele anner plattdüütsche Künstlerinnen un Künstlers tokamen Freedagavend in’e Hamborger Laeiszhall!

Ne'e SASS-Redakschoon för Fehlerkorrektur un Spraakutbo

Verleden Week is künnig maakt worrn, dat bi't plattdüütsche Wöörbook "De ne'e SASS" en ne'e Redakschoon ehr Arbeit opnahm hett. Mit bi de Redakschoon dorbi sünd Robert Langhanke vun'e Uni Flensborg, Manon Hansen, de Vörsittersch vun'e Fehrs-Gill Marianne Ehlers un Kevin Behrens un Christiane Ehlers vun't Nedderdüütschsekretariat mit Sitt in Hamborg. De Redakschoon will in Tokunft mank vele anner Saken den Woortschatt för den Spraakutbo verwiedern un dat Wöörbook överarbeiten un Fehlers korrigeern. Lüüd, de Vörslääg hebbt, köönt an de Email-Adress [email protected] schrieven. In en egen Instagram-Kanaal (https://www.instagram.com/sass.platt/) schüllt vör allen ne'e plattdüütsche Wöör vörstellt un verkloort warrn. Bi "Wi snackt Platt" vertellt Christiane Ehlers mehr över de Arbeit vun de ne'e Redakschoon. https://www.instagram.com/sass.platt

Moderatschoon: Jan Wulf

De Leder in düsse Utgaav:
Moses (keem bit na Woltersbarg) - Iko Andrae
Karola Petersen - Torfrock
Born, wo de Wind herkümmt - Charly Beutin & Die Schreckschussband
Anne Waterkant born (Wellerman up Platt) - Ronny Becker
Fährmann - Godewind
JO! - Die Deichgranaten

Dütmal stellt wi Jo bi "Wi snackt Platt" en jungen plattdüütschen Ledermaker vör, de tokamen Freedagavend (11. Oktober) vunaf Klock 7 an op'e Bühn vun't Börgerhuus in Neendörp to beleven is: Lennon von Seht! Denn geiht dat ok noch üm dat ne'e Stück vun't Amateurtheater in Duvensteed: "Dat Bahn-Chaos - Reisende schall man ophollen" heet dat. Un wi hebbt Besöök in't Studio! Tokamen Dingsdag, den 8. Oktober, dor kümmt in'n Egmont-Verlag en ne'en Asterix-Band op Plattdüütsch rut. Översett hebbt dat Ganze Reinhard Goltz un Peter Nissen - un Peter Nissen, de vertellt bi "Wi snackt Platt" mehr över dat Book un woveel Spaaß he bi dat Översetten vun "Asterix de Gallier" hatt hett.

Henwies: In düsse Utgaav geiht dat ok noch üm de Grote Plattdüütsch-Gala - präsenteert vun NDR 90,3 an'n 18. Oktober in'n groten Saal vun'e Hamborger Laeiszhall. Mehr Informatschonen dorto gifft dat ünner www.plattdeutsch-gala.de

Moderatschoon: Jan Wulf

De Leder in düsse Utgaav vun "Wi snackt Platt":

Leev kaam un bliev in mien Huus - Knipp Gumbo
Disse Tiet - Gerrit Hoss
Mien Jung vun't Dörp - Wiebke Colmorgen & Hardy Kayser
An Land - Annie Heger
Lüttje Glück - Tüdelband

Dütmal geiht dat bi "Wi snackt Platt" üm den Hamborger Heiko Thomsen, de vun de Carl-Toepfer-Stiften mit den Fritz-Reuter-Pries 2024 uttekent worrn is. Denn snackt wi ok noch mit de Perfessersch för nedderdüütsche Spraak un Literatur Ingrid Schröder vun'e Uni Hamborg över dat 150johrige Jubiläum vun den Vereen för nedderdüütsche Spraakforschen, wi vertellt Jo mehr över de 76. Plattdüütsch Dagfohrt vun'n 20. bet to'n 22.September in Bad Bämsen (Bad Bevensen), de düt Johr ünner dat Motto "Junge Lüüd un Platt" stunn - un: wi hebbt mal wedder en Klassiker ut uns Reeg "Hör mal'n beten to" för Jo! Gerd Spiekermann vertellt in en Geschicht ut dat Johr 1889 mehr över en Harvst-Gedicht vun Rainer Maria Rilke. (Quelle: Das Buch der Bilder I/2; 1902 ) Und dat geiht so:

Herbsttag

Herr: es ist Zeit. Der Sommer war sehr groß.
Leg deinen Schatten auf die Sonnenuhren,
und auf den Fluren laß die Winde los.

Befiehl den letzten Früchten voll zu sein;
gieb ihnen noch zwei südlichere Tage,
dränge sie zur Vollendung hin und jage
die letzte Süße in den schweren Wein.

Wer jetzt kein Haus hat, baut sich keines mehr.
Wer jetzt allein ist, wird es lange bleiben,
wird wachen, lesen, lange Briefe schreiben
und wird in den Alleen hin und her
unruhig wandern, wenn die Blätter treiben.


De Leder in uns Sennen:

Wind vun achtern - Godewind
Uns Hoff - Wiebke Colmorgen & Hardy Kayser
Ganz goot - Norma
Kring ut Füer - Knipp Gumbo
Fresenhof - Santiano

Moderatschoon: Jan Wulf

Bi dat Börgerfest vun'n Bundespräsidenten an'n 13. un 14. September in'n Schlottpark vun't Schlott Bellevue in Berlin weern dütmal ok Plattsnackers inlaadt. Bi "Wi snackt Platt" vertellt de Leitersch vun't Plattdüütschbüro vun'e Oostfreesche Landschop Grietje Kammler vun ehrn Snack mit Bunnspräsident Frank-Walter Steinmeier. Kloor, dat dat dorbi ok üm de plattdüütsche Spraak güng.

Denn geiht dat bi "Wi snackt Platt" ok noch üm de grote Plattdüütsch-Gala an'n 18. Oktober in'n groten Saal vun'e Hamborger Laeiszhall un wi sünd bi de Lohbrügger Börgerbühn in Bardörp to Besöök. Dor gifft dat vunaf tokamen Sünnavend, den 28. September, dat Stück "Wahnen in't Glück" to beleven gifft.

Moderatschoon: Jan Wulf

Ove Thomsen is Musiker un plattdüütschen Kinnerbookautor. Verleden Johr is sien Kinnerbook "Regen in'n Kopp" dat plattdüütsch Book vun't Johr worrn. Ok en plattdüütschen Song hett he domals dorto rutbröcht - sien eersten Song op Platt. Man nu hett he naleggt: denn an'n Freedag is sien ne'et Leed "Ünner de Sünn" rutkamen. Bi "Wi snackt Platt" stellt wi Jo den Song vör un wi snackt mit Ove Thomsen över siene Erfolge in Saken Plattdüütsch un ok doröver, woso he sik so för de Spraak insetten deit.

Man dat is noch lang nich allens. Denn wi sünd in düsse Utgaav ok noch bi dat Norderstedter Amateurtheater to Besöök, dat tokamen Dunnerstag Premieer mit dat Stück "Dree Damen in'n Harvst" fiert. Un wi maakt Lust op en Veranstalten an’n Middewekenavend in’n Lichwarksaal vun'e Carl-Toepfer-Stiften. "Dr. Fritz Reuter morgens nicht zu sprechen" heet en Vördrag, den twee echte Reuter-Experten vun't Institut för Nedderdüütsche Spraak in Bremen halen warrt: de Schauspeler un fröhere Baas vun'e Nedderdüütsche Bühn an't Oldenborgsche Staatstheater Herwig Dust un Rainer Schobess, de fröher mal Platt-Redakteur bi'n NDR in Mecklenborg-Vörpommern weer.

Moderatschoon: Jan Wulf